राजपा सांसद कर्णकाे प्रश्न : संसदीय समितिकाे निर्देशन मान्दिनँ भनेर मन्त्री र लाेक सेवा आयाेगले भन्न मिल्छ ?

 असार २, २०७६ सोमबार १२:१४:३५ | उज्यालो सहकर्मी
unn.prixa.net

काठमाण्डाै -  राष्ट्रिय जनता पार्टीले संविधानको कार्यान्वयन र संसदको मर्यादा कायम राख्नेतर्फ गम्भीर भूमिका निर्वाह गर्न गर्न सभामुखको ध्यानाकर्षण गराएको छ ।

प्रतिनिधिसभाको सोमबारको बैठकमा बोल्दै राजपाका सांसद लक्ष्मणलाल कर्ण संसदीय समितिको निर्देशन कार्यान्वयन गराई संसदीय मर्यादा कायम राख्न अभिभावकको भूमिका निर्वाह गर्न सभामुखको ध्यानाकर्षण गराउनुभएको हो । संसदीय समितिले दिएको निर्देशन संवैधानिक निकायका प्रमुख र सरकारका मन्त्रीले मान्दिन भनेर संसदीय गरिमामाथि नै चुनौती दिने काम गरेको भन्दै उहाँले संसदका गरिमा, मर्यादा बचाउन अभिभावकको भूमिका निर्वाह गर्न सभामुखलाई आग्रह गर्नुभयो । समिति र संसदको अवहेलना र उपहास नहोस् भन्नेतर्फ सचेत हुनुपर्नेमा उहाँले जोड दिनुभयो ।

राज्यव्यवस्था समितिले गरेको निर्देशन लोकसेवा आयोगले कार्यन्वयन नगरेकामा उहाँले आक्रोश पोख्नुभयो । संसदीय समितिले लोकसेवा आयोगलाई विज्ञापन रोक्न निर्देशन गरेको र अत्यन्तै आवश्यक भए करारमा राख भनेको स्मरण गराउदै उहाँले संसदको निर्देशन पालना नगरेर मन्त्री र लोकसेवा आयोगले संविधानको उल्लंघन गरेको दाबी गर्नुभयो । उहाँले भन्नुभयो, 'समितिको निर्देशन मान्दिनँ भनेर मन्त्रीले भन्ने ? मन्त्रीको जन्म यही संसदबाट भएको हो । मन्त्री आकाशबाट आएको होइन । मन्त्रीले बुझ्नुपर्छ । यो संसदले जन्माएको हो मन्त्री । लोकसेवा आयोगको अध्यक्षले भन्छ म मान्दिनँ ।'

सांसद कर्णले संघीय मामिला तथा सामान्य प्रशासन मन्त्री लालबाबु पण्डितप्रति लक्षित गर्दै भन्नुभयाे,  'प्रवक्ताले भन्छन् म मान्दिनँ । अब कसको कुरा मान्ने त? संविधान पनि नमान्ने, कानुन पनि नमान्ने र संसदलाई पनि नमान्ने  हो भने यो देश कसले चलाइरहेको छ ? एकजना मन्त्री र एकजना लोक सेवा आयोगले चलाउन सक्छ यो देश ? विज्ञापनको विरोधमा आन्दोलन भइरहँदा कसैलाई चिन्ता नभए पनि हामीलाई चिन्ता छ । यही समानुपातिक समावेशीका लागि हामीले लडाइँ गर्‍या हो आन्दोलन गर्‍या हो ।'

अन्तिम अपडेट: कात्तिक २०, २०७६

तपाईको प्रतिक्रिया