काठमाण्डौ – बेलायत सरकारले विभेद गरेको भन्दै आन्दोलन गरिरहेको ब्रिटिस गोर्खा सत्याग्रह संयुक्त संघर्ष समितिले जुलाई १ देखि गर्ने भनेको आन्दोलनको कार्यक्रमहरु स्थगन गरेको छ । 

सोमबार ललितपुरमा पत्रकार सम्मेलन गर्दै संयुक्त संघर्ष समितिले प्रधानमन्त्री केपी शर्मा ओलीको बेलायत भ्रमणमा समकक्षी टरिजा मेसँग पूर्व गोर्खाहरुको समस्याबारे संवाद गरेको र बेलायती पक्षले सकारात्मक रुपमा लिएको भन्दै आन्दोलनमा जाने निर्णय फिर्ता लिएको बताएको छ । 

पत्रकार सम्मेलनमा ब्रिटिस गोर्खा सत्याग्रह संयुक्त संघर्ष समिति नेपाल च्याप्टरका संयोजक लालबहादुर घिसिङ्गले प्रधानमन्त्री ओलीको बेलायत भ्रमणमा भएको द्विपक्षीय संवादलाई लिएर जुलाई १ बाट गर्ने भनिएको आन्दोलनको कार्यक्रम फिर्ता लिएको बताउनुभयो । 

ब्रिटिस गोर्खा सत्याग्रह संयुक्त संघर्ष समितिलाई बेलायत सरकारले पत्र लेखेर पठाएको हुँदा पनि तत्कालका लागि आन्दोलनका कार्यक्रमहरु फिर्ता लिइएको उहाँले जानकारी दिनुभयो । त्यस्तै संघर्ष समितिका नेपाल संयोजक घिसिङ्गले नेपाल सरकारलाई विगतमा झैँ पहलकदमी लिने समयमा झारा टार्ने काम नगर्न चेतावनी पनि दिनुभयो ।

प्रतिनिधि सभाको अन्तर्राष्ट्रिय सम्बन्ध समितिले नेपाल सरकारलाई ब्रिटिश गोर्खाका पूर्व सैनिकहरुको सम्बन्धमा बेलायत सरकारसँग वार्ता गर्न निर्देशन दिएको छ । ब्रिटिश गोर्खा सत्याग्रह संयुक्त संघर्ष समितिले समस्या समाधान गर्न उच्चस्तरीय वार्ता समिति गठन गर्न पनि माग गरेका छन् ।