चितवन – चितवन राष्ट्रिय निकुञ्जले जीप सफारी बन्द गर्ने भएको छ । बर्खा सुरु भएपछि निकुञ्ज कार्यालयले शनिबारदेखि जीप सफारी बन्द गर्ने निर्णय गरेको निकुञ्जका प्रमुख संरक्षण अधिकृत वेदकुमार ढकालले बताउनुभयो । 

मध्यवर्ती सामुदायिक वन क्षेत्रमा भने जीप चल्ने उहाँले जानकारी दिनुभयो । जीपमा पर्यटक राखेर निकुञ्जको भित्री भाग घुमाउने गरिन्छ । शनिबारदेखि बन्द भएको जीप सफारी दशैं, तिहार लक्षित गरी असोज पहिलो हप्ताबाट खुल्ने उहाँले जानकारी दिनुभयो । 

बाटो हिलो, खाल्डाखुल्डी र घाँसका झाडी बढेकाले जीप चलाउन रोक लगाएको पनि ढकालले बताउनुभयो । गएको वर्ष असार १६ गतेबाटै जीप चलाउन रोक लगाए पनि यसपाली मनसुन ढिलो भएकाले एक हप्ता ढिलोगरी सफारी रोकिएको हो ।

निकुञ्जभित्र घुम्नका लागि सौराहाबाट ३२, कसराबाट १५, भिम्लेबाट १५ र अमलटारी क्षेत्रबाट ७ ओटा जीप छिर्ने गर्छन् ।