ललितपुरमा बाढीले भत्काएका खानेपानी संरचना मर्मत हुँदै, दुई–तीन दिनभित्रै आपूर्ति सहज हुने

साउन ६, २०७६ सोमबार १७:६:५३ | उज्यालो सहकर्मी

ललितपुर – ललितपुरमा बाढी तथा पहिरोले क्षति पुर्‍याएका खानेपानीका संरचना मर्मत भैरहेको काठमाण्डौ उपत्यका खानेपानी लिमिटेड केयूकेएलले जनाएको छ ।

बाढीले ललितपुरको नल्लु, देवकी र बासुकी मुहानमा र फर्पिङमा पहिरो गएका कारण केही दिनदेखि ललितपुर क्षेत्रमा खानेपानी आपूर्ति हुन सकिरहेको छैन । ललितपुर क्षेत्रमा खानेपानीको अभाव चर्किंदै गएपछि काठमाण्डौ उपत्यका खानेपानी लिमिटेड (केयूकेएल) ले देवकी र बासुकी मुहानको मर्मतलाई तीव्रता दिइरहेको छ ।

बाढीका कारण देवकी र बासुकी मुहानमा पुरै क्षति पुर्‍याएको थियो भने नल्लुमा झण्डै साढे २ किलोमिटर पाइप लाइन बगाएको थियो । केयूकेएलको ललितपुर शाखाका प्रमुख डा. डोलप्रसाद चापागाईँले तत्कालका लागि देवकी र बासुकी मुहानको मर्मत गरी झण्डै ५० प्रतिशत पानी चापागाउँको ट्यांकीमा खसाल्न सकिएको जानकारी दिनुभयो ।

‘तत्काल देवकी र बासुकी मुहानको मर्मत गरिरहेका छौँ । यी दुई मुहानको मर्मत गरेर भए पनि ललितपुर क्षेत्रमा पानी वितरण गर्ने तयारी गर्दैछौँ’, शाखा प्रमुख चापागाईँले भन्नुभयो, ‘फर्पिङमा पहिरोले मुहान र पाइप बगाएर पुरै क्षति पुर्‍यायो त्यसको पनि मर्मत गर्दैछौँ । तत्कालका लागि २–३ दिनभित्र नै खानेपानीको आपूर्ति सहज हुन्छ ।’

बाढीले क्षति पुर्‍याएको मुहान र पाइपलाइनको विषयमा अध्ययन तथा अनुगमन गर्दै आउनुभएका काठमाण्डौ उपत्यका खानेपानी व्यवस्थापन बोर्डका कार्यकारी निर्देशक डा. सञ्जि विक्रम राणाले बाढीबाट मुहान र पाइपलाइनमा गरी झण्डै ३ करोड ७१ लाख बराबरको क्षति भएको जानकारी दिनुभएको छ ।

केयूकेएलले फर्पिङबाट पानी पम्पिङ गरी ललितपुरका विभिन्न शहरबजारमा खानेपानी वितरण गर्ने गरेको छ भने देवकी, बासुकी र नल्लुबाट आउने पानी ललितपुरको चापागाउँस्थित ट्यांकीमा खसाली त्यहीँबाटै वितरण गर्ने गरेको छ । फर्पिङबाट पम्पिङ गरेर ल्याइएको पानी ललितपुरका पश्चिमतिरका केही ठाउँहरुमा समेत वितरण गर्ने गरिएको छ ।

अन्तिम अपडेट: फागुन १०, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्