‘ठेक्का होल्ड गर्ने र समयमै काम नसक्ने निर्माण व्यवसायीलाई कालाे सूचीमा राखिन्छ’

भदौ २८, २०७६ शनिबार १४:३९:३० | जनार्दन घिमिरे

गुल्मी – परराष्ट्र मन्त्री प्रदीपकुमार ज्ञवालीले निमार्ण व्यवसायीको लापर्वाहीका कारण कतिपय योजनाहरु अलपत्र परेको बताउनु भएको छ ।

मन्त्री ज्ञवालीले कतिपय व्यवसायीहरुले ठेक्का होल्ड गरेर राख्ने र १० ठाउँमा हात हालेर समयमा काम सम्पन्न नगर्ने कुरा अब सरकारका लागि सह्य नहुने समेत चेतावनी दिनुभएको छ ।

मन्त्री ज्ञवालीले आफ्नो निर्वाचन क्षेत्र गुल्मीको क्षेत्र नम्बर १ मा लामो समयदेखि अलपत्र अवस्थामा रहेका योजनाहरुको शनिबार अनुगमन र निरीक्षण गर्ने क्रममा यस्तो बताउनुभएको हो । उहाँले निर्माण व्यवसायीहरुले देशलाई केन्द्रमा राखेर र जनताको हितलाई ध्यानमा राखेर काम गर्नसमेत आग्रह गर्नुभयाे ।

मन्त्री ज्ञवालीले योजनाहरुको काम समयमै सम्पन्न नगर्दा जनताले दुःख पाउनु परेको समेत बताउनु भयो । गुल्मीको क्षेत्र नम्बर १ मा अलपत्र अवस्थामा रहेको सत्यवती गाउँपालिका अन्तरगत उल्ली खोलाको पक्की पुल, रुरुक्षेत्र गाउँपालिका अन्तरगतका पुल, रुद्रवेणी–वामीटक्सार सडक, सिस्ने खोलाको पुल र चोरकाटे लगायतका स्थानमा रहेका पक्की पुल र सडकको अनुगमन गर्नुभयो ।

ज्ञवालीले अलपत्र अवस्थामा रहेका योजनाहरु समयमै सम्पन्न गर्नका लागि आवश्यक प्रक्रियाहरु अघि बढाउन सम्बन्धित कार्यालयलाई निर्देशनसमेत दिनुभयो । केही योजनाहरुमा निर्माण व्यवसायीहरुले प्राविधिक कारण देखाएर लामो समयदेखि योजना सम्पन्न नगरिकन आलटाल गर्ने काम भैरहेको भन्दै ज्ञवालीले अब कुनै पनि बहानामा त्यस्ता व्यवसायीहरुलाई छुट नहुने तर्क गर्नुभयो ।

उहाँले समयमा काम नसक्ने निर्माण व्यवसायीहरुलाई अब कालो सूचीमा राखेर कारबाहीको दायरामा ल्याउनुको समेत विकल्प नभएको बताउनु भयो ।

परराष्ट्र मन्त्री ज्ञवालीले गुल्मीको धार्मिक स्थल रुरुक्षेत्रमा शनिबारदेखि सञ्चालन हुन गैरहेको श्रीमद्भागवत पितृमोक्ष विराट ज्ञान महायज्ञको उद्घाटन गर्नुहुने कार्यक्रम छ ।

अन्तिम अपडेट: मंसिर ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

जनार्दन घिमिरे

गुल्मीका क्रियाशील पत्रकार जनार्दन घिमिरे लामो समयदेखि उज्यालोमा कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्