काठमाण्डौ – नेप्से परिसूचक आइतबार २१ अङ्कभन्दा धेरैले बढेको छ । 

कारोबार हुने हप्ताको पहिलो दिन आइतबार परिसूचक २१ दशमलव २६ अङ्कले बढेर १३ सय ४६ दशमलव ६४ बिन्दुमा पुगेको नेपाल स्टक एक्सचेन्ज लिमिटेडले जनाएको छ । 

व्यापार र जीवन बीमा समूहबाहेक आइतबार सबै समूहको उपसुचक बढेको छ । सबैभन्दा धेरै निर्जिवन बीमा समूहको १०१ दशमलव ५२ अङ्कले बढेको छ । ‘क’ वर्गका कम्पनी मापन गर्ने सेन्सेटिभ इन्डेक्स पनि आइतबार ५ अङ्कले बढेको छ । 

आइतबार २ अर्ब ७ करोड ७९ लाख रुपैयाँ बराबरका ५३ लाख ४६ हजार कित्ता शेयर किनबेच भएका छन् । सूर्य लाइफ इन्स्योरेन्स कम्पनी लिमिटेडको आइतबार सबैभन्दा धेरै १० करोड ११ लाख रुपैयाँको शेयर कारोबार भएको छ ।

नेप्से र कारोबार दुवै सुधार भएको दिन आइतबार ग्रामीण विकास वित्तीय संस्था लिमिटेड, नयाँ नेपाल लघुवित्त विकास बैंक लिमिटेड र मिथिला लघुवित्त वित्तीय संस्था लिमिटेडका शेयर लगानीकर्ताले झण्डै १० प्रतिशत कमाएका छन् ।

गुह्वेश्वरी मर्चेन्ट बैंक तथा फाइनान्स कम्पनी लिमिटेडका शेयर लगानीकर्ताले भने ५ प्रतिशत गुमाएका छन् ।