काठमाण्डाै – टर्कीको इस्तानबुलमा अवतरण गर्ने क्रममा विमान दुर्घटना हुँदा तीन जनाको ज्यान गएको छ ।

विमान दुर्घटनामा १ सय ७० जना घाइते भएका छन् । इज्मिर प्रान्तबाट गएको बोइङ ७३७ विमान सबिहा गोक्सेन विमानस्थलमा अवतरण गर्ने क्रममा धावनमार्गमा चिप्लिएर दुर्घटना हुँदा तीन जनाको ज्यान गएको बीबीसीले जनाएको छ ।

भारी वर्षासँगै तीव्र गतिमा हावा चलेका बेला दुर्घटना भएको खबरमा उल्लेख छ । दुर्घटनापछि विमानस्थल बन्द गरिएको थियाे भने उडान 'डाइभर्ट' गरिएको थियाे ।विमानमा १२ देशका २२ जना पर्यटक रहेका पेगासस एअरलाइन्सले जनाएको छ । 

दुर्घटनापछि विमान तीन टुक्रा भएकाे जनाइएकाे छ । अहिले विमानस्थल सञ्चालनमा आइसकेकाे छ ।  

विमानमा चालक दलका सदस्यसहित १ सय ८३ जना थिए । दुर्घटनापछि विमानमा लागेकाे आगाे दमकलकाे सहायतामा निभाइएकाे थियाे ।