काठमाण्डाै – काेभिड–नाइन्टिनको सङ्क्रमण बढ्ने क्रम तीव्र बनेपछि इरानले देशभित्रको आवत जावत सीमित गरेकाे छ ।

एक महिनाका लागि सबै विद्यालयमा बिदा दिएको इरानले आवत जावतमा पनि कडाइ गरेको हो । इरानमा कोरोना भाइरसकाे सङ्क्रमणबाट एक सय सात जनाकाे ज्यान गइसकेको छ ।

यस्तै अमेरिकाको क्यालिफोर्निया राज्यमा पनि आपत्काल घोषणा गरिएको बीबीसीले जनाएको छ । यसअघि वाशिङ्टनमा आपत्काल घोषणा गरिएको थियो ।

भारतको राजधानी दिल्लीका सबै प्राथामिक विद्यालय मार्च महिनाभरिका लागि बन्द गरिएका छन् भने विद्युतीय हाजिरीमा प्रतिबन्ध लगाइएको छ ।

यस्तै दक्षिण कोरिया र जापानमा पनि कोरोनाको सङ्क्रमण फैलने क्रम तीव्र बनेको छ । दक्षिण कोरियामा ४० जनाको ज्यान जानुको साथै ६ हजारभन्दा धेरैमा सङ्क्रमण भैसकेको छ ।

जापानमा ६ जनाको ज्यान जानुको साथै तीन सय ६४ जनामा सङ्क्रमणकाे पुष्टि भएको छ । तर जापानमा लक्षण देखिएका सबैको परीक्षण नभएको समाचार संस्था सीएनएनले जनाएको छ ।

कोरोनाको सङ्क्रमण सुरु भएको चीनमा सङ्क्रमण र ज्यान गुमाउनेको सङ्ख्या घटिरहँदा चीनबाहिर भने सङ्क्रमण तीव्र बनेको छ । कोरोना भाइरसको कारण अहिलेसम्म साढे ३३ सयभन्दा धेरैको ज्यान गएको छ भने ९८ हजारभन्दा धेरैमा सङ्क्रमण भएको छ ।

त्यस्तै ५४ हजारभन्दा धेरै मानिस उपचारपछि घर फर्किएका छन् ।