काठमाण्डौ – इरानका सर्वाेच्च नेता आयातुल्लाह खामेनेईले दिल्लीमा भएको हिंसालाई लिएर भारतको निन्दा गरेका छन् ।

दिल्लीको उत्तर–पूर्वी जिल्लामा गएको २४–२६ फेब्रुअरीमा भएको हिंसामा अहिलेसम्म झण्डै ५० जनाको ज्यान गइसकेको छ भने दुई सय भन्दा धेरै घाइते भएका छन् । 

नागरिकता संशोधन कानुन (सीएए) को विरोधलाई लिएर भएको हिंसामा ज्यान गुमाउनेमध्ये धेरै मुस्लिम समुदायका रहेका छन् । 

इरानका सर्वाेच्च धार्मिक नेता खामेनेईले बिहीबार ट्वीट गर्दै भारतमा मुस्लिममाथि दमन भइरहेको र विश्वभरिका मुस्लिम समुदाय यसबाट दुःखी भएको बताए । 

उनले ट्वीटमा लेखेका छन्, ‘भारतमा भइरहेको मुस्लिमको नरसंहारले विश्वभरिका मुस्लिम समुदायको मन दुखेको छ । भारत सरकारले कट्टर हिन्दू र तिनका पार्टीलाई रोक्नुपर्छ र इस्लामीहरुको तर्फबाट भारत छिन्न भिन्न हुनबाट रोकिन चाहन्छ भने भारतमा मुस्लिम समुदायको नरसंहार रोकिनुपर्छ ।’

— Khamenei.ir (@khamenei_ir) March 5, 2020

खामेनेईले आफ्नो ट्वीटसँगै #IndianMuslimslnDanger अर्थात् ‘भारतीय मुसलमान खतरामा छन्’ लेखेका छन् ।   

खामेनेईको ट्वीटमा अहिलेसम्म भारतको कुनै प्रतिक्रिया सार्वजनिक भएको छैन तर पाकिस्तानका प्रधानमन्त्री इमरान खानले ट्वीट गरेर खामनेईलाई धन्यवाद दिएका छन् ।  

— Imran Khan (@ImranKhanPTI) March 5, 2020