काठमाण्डौ – इरानमा कोरोना भाइरस (कोभिड–१९) को सङ्क्रमणबाट ज्यान गुमाउनेको सङ्ख्या आठ सय ५३ पुगेको छ । 

पछिल्लो समय इरानमा कोरोना भाइरसबाट सङक्रमित हुने र ज्यान गुमाउनेको सङ्ख्या तीव्र रुपले बढिरहेको छ । एक सय २९ जना ज्यान गुमाउनेको सङ्ख्या थपिएसँगै भाइरसबाट सङ्क्रमित हुनेको सङ्ख्या झण्डै १५ हजार नजिक पुगेको छ । 

चार हजार पाँच सयभन्दी बढी उपचारपछि घर फर्किएका छन् । त्यस्तै एक हजार ५३ जना नयाँ सङ्क्रमित थपिएका छन् । 

कोरोनाका कारण इरानमा सर्वोच्च नेताको चुनाव गराउने शीर्ष धार्मिक सङ्गठनका एक ७८ वर्षीय सदस्यको पनि ज्यान गएको छ । 

समाचार संस्था एएफपीका अनुसार इरानमा एकैदिन ज्यान गुमाउनेको यो सङ्ख्या अहिलेसम्मकै धेरै हो । इरानको स्वास्थ्य मन्त्रालयका प्रवक्ता कियानुस जहानपोरले भाइरसको सङ्क्रमणलाई गम्भीरतापूर्वक लिन र सकेसम्म यात्रा नगर्न सर्वसाधारणसँग अपिल गरेका छन् ।   

इरानमा गएको फेब्रुअरी १९ मा कोरोनाका कारण पहिलो व्यक्तिको ज्यान गएको थियो । 

विश्वव्यापी रुपमा फैलिएको भाइरसका कारण अहिलेसम्म ६ हजार ६ सयभन्दा बढीले ज्यान गुमाइसकेका छन् । सङ्क्रमण हुनेको सङ्ख्या एक लाख ७४ हजार पुग्दा ७७ हजार बढी उपचारपछि घर फर्किएका छन् ।