‘लकडाउन’ का अवधिमा घरमै बसेर सिर्जनात्मक र रचनात्मक काम गर्न सकिन्छ : राष्ट्रपति भण्डारी

चैत १२, २०७६ बुधबार १८:२४:२४ | रासस

काठमाण्डौ – राष्ट्रपति विद्यादेवी भण्डारीले कोरोना भाइरस (कोभिड १९) ले विश्वव्यापी महामारीको रूप लिएकाले वर्तमान संवेदनशील अवस्थालाई ध्यानमा राख्दै सबै नेपालीलाई आ–आफ्नै घरमा बस्न आह्वान गर्नुभएको छ ।

कोभिड १९ बाट उत्पन्न विश्वव्यापी महामारीको रोकथामको सन्दर्भमा सन्देश प्रकाशित गर्दै उहाँले सबै नागरिकलाई सरकारका आधिकारिक निकायले जारी गरेका निर्देशन एवम् आचारसंहिता पालना गरेर आफू र आफ्नो परिवारको अमूल्य जीवनको रक्षा गर्न आग्रह गर्नुभएको छ ।

सन्देशमा उहाँले कोरोना भाइरसले मानव सभ्यता र मानिसको अस्तित्वमाथि नै विश्वव्यापी चुनौती खडा गरेको यस जटिल परिवेशलाई निस्तेज पार्ने अभियानमा सबैलाई एकजुट भइ अघि बढ्न आग्रह गर्नुभएको छ ।

उहाँले सन्देशमा नेपाल सरकारद्वारा कोरोनाको सङ्क्रमण रोक्नका लागि लागु गरिएको ‘लकडाउन’का अवधिमा घरमै बस्नु परेको अवस्थालाई सिर्जनात्मक, रचनात्मक र उत्पादनमूलक बनाउन सकिने बताउनुभएको छ । उहाँले भन्नुभएको छ, ‘यस समयलाई हामी सबैले देशको अर्थतन्त्रलार्ई स्वावलम्बी र आत्मनिर्भर बनाउनका लागि के गर्न सकिन्छ भन्ने विषयमा अध्ययन, अनुसन्धान र चिन्तन मनन गर्ने काममा समेत सदुपयोग गर्न सकिन्छ भन्ने मलाई लागेको छ ।’

सन्देशमा उहाँले कोरोनाविरुद्ध लड्न स्वास्थ्यसम्बन्धी भौतिक पूर्वाधार तथा प्राविधिक तयारीसहित आवश्यक प्रवन्ध मिलाउन सङ्घ तथा प्रदेश सरकार, जिल्ला समन्वय समिति, नगरपालिका र गाउँपालिकाबीच सुदृढ समन्वय कायम हुनुपर्नेमा सम्बद्ध सबै पक्षको ध्यान आकृष्ट गराउनुभएको छ ।

आजको यस संवेदनशील परिस्थितिमा सही सूचना ग्रहण र प्रवाह गर्दै कोभिड १९ विरुद्ध सचेतनापूर्वक अग्रसर हुन सम्पूर्ण राजनीतिक दल तथा तिनका भ्रातृ तथा भगिनी सङ्गठन, चेतनाका संवाहक युवा तथा विद्यार्थी समुदाय, कल्याणकारी सङ्घ संस्थालगायत सबैलाई आह्वान समेत गर्नुभएको छ ।

कोरोनाविरुद्ध जुध्नका लागि सम्पूर्ण सुरक्षा संयन्त्र र चिकित्सक एवं स्वास्थ्यकर्मीबाट भइरहेको सत्प्रयासमा सम्बद्ध सबै पक्षबाट आवश्यक सहयोग र समन्वयको अपेक्षासमेत राष्ट्रपति भण्डारीले व्यक्त गर्नुभएको छ । सन्देशमा उहाँले यस महामारीबाट अहिलेसम्म विश्वका प्रायः सबैजसो देश प्रभावित हुनाका साथै चार लाखभन्दा बढी जनामा सङ्क्रमण भइ १८ हजारभन्दा बढीको ज्यान गइसकेकाले संयमित बन्दै घातक भाइरसका विरुद्धको अभियानलाई सुदृढ तुल्याएर अमूल्य मानव जीवनको रक्षार्थ सम्बद्ध सबै पक्षलाई आआफ्ना ठाउँबाट क्रियाशील हुन आह्वान समेत गर्नुभएको छ ।

‘सुरुमा चीनको वुहान शहरमा देखापरेको यस महामारीविरुद्ध चिनियाँ सरकारद्वारा सञ्चालित प्रभावकारी जनस्वास्थ्य प्रतिकार्य र यसमा त्यहाँका लगनशील एवं अनुशासित स्वास्थ्यकर्मी तथा जनताको सक्रिय सहभागिताका कारण चीनमा यो रोग लगभग नियन्त्रणमा आएको ठानिएको छ’, उहाँको सन्देशमा भनिएको छ, ‘तर अहिले यो महामारी एसियाका दक्षिण कोरिया, जापान, इरान, युरोपका इटाली, स्पेन, जर्मनी, फ्रान्सलगायत अमेरिका र बाँकी देशहरूमा समेत फैलिइसकेको छ । यस महामारीको विरुद्धमा विश्व स्वास्थ्य सङ्गठन लगायत विभिन्न अन्तर्राष्ट्रिय र क्षेत्रीय मञ्चहरू सहित प्रभावित देशका सरकारहरू तदारुकताका साथ क्रियाशील बनेका छन् ।’

आजसम्म कोभिड १९ विरुद्धको प्रभावकारी औषधि र खोप विकास भइनसकेको र आर्थिक रूपमा सम्पन्न एवं सुदृढ स्वास्थ्य प्रणाली भएका विकसित देशलाई समेत यो महामारी नियन्त्रण गर्न कठिनाइ भइरहेका सन्दर्भमा रोगको सङ्क्रमणको रोकथाममा नै हाम्रा प्रयास केन्द्रित हुनुपर्ने सन्देशमा राष्ट्रपतिले बताउनुभएको छ । कोरोना भाइरसको सङ्क्रमणलाई रोक्नका लागि शारीरिक दुरी कायम गर्दै सरसफाइसहित घरमा बस्नु नै उत्तम विकल्प हुनेमा उहाँले जोड दिनुभएको छ ।

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

‘लकडाउन’ का अवधिमा घरमै बसेर सिर्जनात्मक र रचनात्मक काम गर्न सकिन्छ : राष्ट्रपति भण्डारी

फाइल फोटो

तपाईको प्रतिक्रिया