धरानबाट सुरु भयो कोरोना परीक्षण : मुख्यमन्त्रीद्वारा निरीक्षण

 चैत १६, २०७६ आइतबार १९:१३:४२ | उज्यालो सहकर्मी
unn.prixa.net

सुनसरी - धरानमा रहेको बीपी कोइराला स्वास्थ्य विज्ञान प्रतिष्ठानमा आइतबारबाट कोरोना भाइरसको परीक्षण गर्न सुरु गरिएको छ । राष्ट्रिय जनस्वास्थ्य प्रयोगशाला, टेकुमा मात्र भइरहेको कोरोना परीक्षण काठमाण्डौ बाहिर बीपी प्रतिष्ठानमा सुरु भएको हो ।

प्रदेश १ का मुख्यमन्त्री शेरधन राई र सामाजिक विकासमन्त्री जीवन घिमिरेले प्रतिष्ठानमा स्थापना भएको ल्याबसँगै हेल्प डेस्क र आइसोलेसनको पनि निरीक्षण गर्नु भएको हो । प्रदेश सरकारका मुख्यमन्त्री र मन्त्रीले प्रतिष्ठानमा कोरोनाका बिरामीहरुलाई गरिने उपचारबारे प्रतिष्ठानका कार्यवाहक उपकुलपति प्रा.डा.गुरुप्रसाद खनालले जानकारी लिनुभएको थियो ।

प्रतिष्ठानको माइक्रोबायोलजी युनिटले प्रतिष्ठानकै आइसोलेसनमा भर्ना भएका तीन जना बिरामीको स्वाब संकलन गरेर परीक्षण थालेको छ । प्रतिष्ठानका मेडिसिन विभाग प्रमुख डा. सञ्जिवकुमार शर्माका अनुसार दैनिक १२ जनाको स्वाब परीक्षण गर्नेगरी ल्याब स्थापना भएको छ ।  ल्याबको क्षमता भने अधिकतम उपयोग गर्दा ३० वटासम्म परीक्षण गर्न सकिने छ ।

धरानमा प्रदेश १ र २ मा संकलन भएको स्वाबको परीक्षण गर्नेगरी ल्याब स्थापना भएको छ । मुख्यमन्त्री राईले परीक्षण सुरु भएपछि प्रदेश १ मा कोरोना परीक्षणमा सहज हुने बताउनुभयो ।

सुरूवातमा धरानमा परीक्षण भएको १० वटा नेगेटिभ र ५ वटा पोजेटिभ नमुनालाई क्रस चेक गर्न काठमाण्डौमा रहेको राष्ट्रिय जनस्वास्थ्य प्रयोगशालामा परीक्षण गरिनेछ। एउटा ल्याबले गरेको परीक्षण अर्को ल्याबसँग मिल्छ कि मिल्दैन भनेर क्रस परीक्षण गरिने बताइएको छ ।

स्वास्थ्य मन्त्रालयको अनुसार हालसम्म देशमा कोरोनाको लागि ८७५ वटा नमुना राष्ट्रिय जनस्वास्थ्य प्रयोगशालामा परीक्षण गरिएकोमा ५ जनामा संक्रमण देखिएको छ ।

पहिलो कोरोना पोजिटिभको केश अन्तर्गत माघ ९ गते नै पोजिटिभ देखिएको र हाल उनी पूर्ण स्वस्थ छन् । अन्य चार जना उपचारको क्रममा रहेका छन् ।

अन्तिम अपडेट: चैत ११, २०८०

तपाईको प्रतिक्रिया