काठमाण्डौ – कोरोना सङ्क्रमितको संख्या बढेपछि साउदीले अनिश्चितकालका लागि अन्तराष्ट्रिय उडानसँगै निजी र सार्वजनिक सेवाहरु बन्द गरेको छ । कोरोना रोकथामका लागि यसअघि दुई हप्ताका लागि सरकारी र निजी कार्यालयहरुका सबै हवाईसेवा, बस, रेल लगायतका सेवा बन्द गरेको थियो ।

तर आइतबार सङ्क्रमित र मृत्यु हुनेको संख्या पनि बढेपछि साउदीले अनिश्चितकालका लागि बन्द गरेको अरब न्युजले खबर लेखेको छ । रियाद, मक्का र मदिनामा स्थानीय समय अनुसार दिउँसोको तीन बजेदेखि नै कर्फ्यु जारी गरिएको छ भने यी सहर लकडाउन पनि छन् ।

एक सहरबाट अर्को सहरमा आउन जान पनि रोक लगाइएको छ । आइतबार ९६ जना नयाँ सङ्क्रमितको सँख्या थपिएको र उनीहरुमध्ये २८ जना यात्राका कारण र ६८ जनामा पुराना सङ्क्रमितसँगको सम्पर्कका कारण भएको साउदीको स्वास्थ्य मन्त्रालयले जनाएको छ ।

खाडीका अरु देशको तुलनामा साउदीमा कोरोना सङ्क्रमतिको सँख्या बढी भए पनि अहिलेसम्म नेपाली श्रमिक सुरक्षित रहेको साउदीमा रहेको नेपाली दूतावासले जनाएको छ ।