बाजुरा जिल्लाबाट कर्णाली प्रदेशसँग जोडिएका सबै नाकाका पुलमा तारबार

 चैत २५, २०७६ मंगलबार १६:१०:५० | उज्यालो सहकर्मी
unn.prixa.net

बाजुरा  - बाजुरा जिल्लाबाट कर्णाली प्रदेशसँग जोडिएका सबै नाकामा पर्ने पुलमा तारबारले बाटो छेकिएको छ । 

जिल्लाको स्वामीकार्तिक खापर, जगन्नाथ र हिमाली गाउँपालिकासँग जोडिएका कर्णली नदीका रहेका पुलहरुमा काँडेतारको बार लगाइएको छ । भारतबाट र शहरबाट आएकाहरु रातको समयमा समेत गाउँमा प्रवेश गर्ने जोखिम बढेकाले तारबार लगाइएको हो ।

बाजुराबाट हुम्लासँग जोडिएको कवाडी र जिमानाबाट देउसैन आउने बाटो, मुगु जाने बाटा,े बिनघाट, लेब्ड्री, झुगला, पुराना झुगला र स्वामीकार्तिक जाने बाटो चुलीगाड, पिलुघाट, बेर्मा र कालिकोटको जितेगडाको फेरि पनि अहिले पूर्णरुपमा बन्द गरीएको छ।

जिल्ला प्रशासन कार्यालय बाजुराले जिल्लाका नौ वटा स्थानीय तहबाट संकलन गरेको तथ्याङ्क हेर्दा चैत्र महिनामा मात्र भारतबाट आएकाहरुको संख्या एक हजार ४८ छ । दक्षिण कोरियाबाट एक जना, साउदी अरबबाट एक र बहराइनबाट एक जना गरी अन्तर्राष्ट्रिय उडाबाट तीन जना जिल्लामा आएको तथ्याङ्क रहेकोसहायक प्रमुख जिल्ला अधिकारी समिर भण्डारीले बताउनुभयो । 

उहाँले भन्नुभयो, ‘जिल्लाभरका १५ वटा क्वरेण्टीनमा एक सय १७ जना राखिएका छन् जसमा भारतबाट आएका मात्र ५४ जना रहेका छन् । भारतबाट आएकाहरु मुख्य बाटो प्रयोग नगरेर गाउँ जाने खतरा छ । त्यसैले पालिकाले पुलमा तारबार लगाएर बन्द गरेको हुनुपर्छ ।’

कर्णाली नदीको पारीपट्टि रहेको स्वामिकार्तिक खापर गाउँपालिका कर्णाली प्रदेशको मुगु र कालिकोट जिल्लासँग जोडिएको छ । त्यहाँ भारतबाट आउने सबै रुटबाट जानेहरुका लागि कर्णली पुलमा तारबार लगाइएको छ ।

‘कालिकोट, मुगु र धनगढीबाट आउने सबै बाटाहरु कर्णाली पुल तरेर जानु पर्छ । त्यसो भएकाले राति लुकेर आउने डरले पुलमा तारबार हालिएको हो’, स्वामीकार्तिक खापर गाउँपालिकाका अध्यक्ष चिरन्जिबी शाहीले बताउनुभयो । 

बाजुराबाट हुम्ला र मुगु जिल्लामा जाने बाटोको कवाडी, र झुगलामा रहेका कर्णाली नदिमाथिको पुलमा हिमाली गाउँपालिकाले आवतजावतमा कडाइ गरेको छ ।

‘ बाहिर जिल्लामा आउने जानेहरु बाट रोग फैलने डर भएकाले यसो गर्नु परेको हो, भारत र शहरी क्षेत्रबाट आएर आफ्नो घर जानेहरु यही बाटो भएर जान्छन्’, हिमाली गाउँपालिकाका अध्यक्ष गोबिन्द बहादुर मल्लले बताउनुभयो । 

जगन्नाथ गाउँपालिकाका रोजगार अधिकृत लक्ष्मण जोशीका अनुसार कालिकोट जिल्लाको जितेगडा भएर हुम्ला, मुगु र बाजुरा आउने यात्रुहरु समेत रातदिन हुल बाँधेर हिँड्न थालेपछि बीच बाटोमा पर्ने जगन्नाथ गाउँपालिकामा समस्या पर्नसक्ने देखेर कडाइ गरिएको हो ।

बाजुरा जिल्लाबाट कर्णाली प्रदेशसँग जोडिएका पुलहरुमा पनि काँडे तार लगाइएको छ । ‘यो रोग विश्वभर माजिसहरु एक ठाउँबाट अर्को ठाउँ आवतजावत गरेका कारण सरेको देखिन्छ । यहाँ त्यसो नहोस् भनेर तारबार गर्नु परेको हो’, जोशीले थप्नुभयो । 

 

अन्तिम अपडेट: असार १४, २०७७

तपाईको प्रतिक्रिया