काठमाण्डौ - बेलायतका डाक्टरले अत्यावश्यक सुरक्षा सामग्रीको अभावमा आफूहरुको जीवन जोखिममा रहेको बताएका छन् । 

बेलायतको डाक्टरहरुको सङ्गठनले कोरोना भाइरस (काेभिड १९) सङ्क्रमित बिरामी जाँच्न आवश्यक सुरक्षा सामग्री नपाइएको जनाएको छ । बेलायतको मेडिकल एसोसिएशन (बीएमए) ले पनि काेराेना सङ्क्रमितकाे उपचारमा खटिएका डाक्टरहरुको जीवन जोखिममा रहेको बताएको बीबीसीले जनाएको छ ।  

बीएमएका काउन्सिल अध्यक्ष डाक्टर चाँद नागपालले डाक्टरहरुलाई अप्ठेरो अवस्थामा पुर्‍याइउकाे भन्दै उनीहरूसामु उचित सुरक्षाबिना नै काम गर्नुपर्ने बाध्यात्मक परिस्थिति उत्पन्न भएको बताएका छन् । 

बेलायतमा अहिलेसम्म ७३ हजार सात सय ५८ जना कोरोना सङ्क्रमित भेटिएका छन् भने कोरोनाका कारण झण्डै ९ हजार जनाको ज्यान गएको छ । 

यस्तै कोरोना सङ्क्रमितको सङ्ख्या विश्वमा १७ लाख पुगेकाे छ । तीन लाख ७७ हजारभन्दा धेरै उपचारपछि घर फर्किएका छन् भने एक लाखभन्दा धेरैको ज्यान गएको छ । 

कोरोनाका कारण सबैभन्दा धेरै अमेरिका आक्रान्त बनेको छ । अमेरिकामा पाँच लाखभन्दा धेरैलाई कोरोना भाइरसको सङ्क्रमण भएको छ ।