काठमाण्डौ – स्पेन सरकारका अनुसार कोरोना भाइरस (कोभिड १९) को सङ्क्रमणका कारण स्पेनमा २० हजारभन्दा धेरैको ज्यान गएको छ । स्वास्थ्य मन्त्रालयका अनुसार भाइरसको सङ्क्रमणका कारण २० हजार ४३ जनाको ज्यान गएको छ । 

पछिल्लो २४ घण्टामा पाँच सय ६५ जनाको ज्यान गएको छ । अमेरिका र इटलीपछि स्पेनमा सबैभन्दा धेरैको ज्यान गएको छ । एक लाख ९१ हजार सात सयभन्दा बढी सङ्क्रमित भएका छन् । सङ्क्रमणका हिसाबले स्पेन दोस्रो नम्बरमा छ । 

कोरोनाको सङ्क्रमणका कारण अमेरिकामा सबैभन्दा धेरै ३७ हजारभन्दा धेरैको ज्यान गएको छ, सात लाख १० हजारभन्दा धेरै सङ्क्रमित भएका छन् ।

अमेरिकापछि इटलीमा सबैभन्दा धेरै २२ हजार सात सयभन्दा धेरैको ज्यान गएको छ भने एक लाख ७२ हजार चार सयभन्दा धेरै सङ्क्रमित भएका छन् । 

दुई सय १० देश र दुई वटा अन्तर्राष्ट्रिय पानी जहाजमा कोरोनाको सङ्क्रमण फैलिँदा विश्वभर २२ लाख ६९ हजार आठ सयभन्दा धेरै सङ्क्रमित भएका छन् । सङ्क्रमणबाट एक लाख ५५ हजारभन्दा धेरैको ज्यान गएको छ भने पाँच लाख ८२ हजारभन्दा धेरै उपचारपछि निको भएका छन् । 

 यो पनि पढ्नुहोस्

अप्रिल १८ : खाडी र मलेसियामा काेराेना सङ्क्रमितकाे सङ्ख्या २९ हजार नाघ्याे