काठमाण्डौ - सरकारले काठमाण्डौका मस्जिदमा रहेकाहरुको कोरोना भाइरस परीक्षण सुरु गरेको छ । 

उदयपुरको मस्जिदमा रहेका मानिसमा कोरोनाको सङ्क्रमण देखिएपछि काठमाण्डौका मस्जिदमा रहेका सबैको परीक्षण सुरु गरिएको स्वास्थ्य विभागका महानिर्देशक महेन्द्रप्रसाद श्रेष्ठले जानकारी दिनुभयो । 

उहाँका अनुसार बिहीबारदेखि यहाँका मस्जिदमा रहेका मानिसको परीक्षण पोलिमरेज चेन रियाक्सन (पीसीआर) सुरु गरिएको छ । उहाँका अनुसार बिहीबार ७६ जनामा परीक्षण गरिएको र बाँकीको आज पनि भइरहेको छ । काठमाण्डौमा दुई जना सङ्क्रमित रहेको अनुमान गरिएको छ ।

उदयपुरको त्रियुगा नगरपालिकाको भुल्केमा रहेको मस्जिदमा २७ जनामा कोभिड-१९ सङ्क्रमण देखिएको थियो । तिमध्ये तीन जना काठमाण्डौमा गएको देखिएको महानिर्देशक श्रेष्ठले जानकारी दिनुभयो ।