चाँगुनारायणमा ड्रोनमार्फत सर्वेक्षण र नक्साङ्कन

वैशाख १४, २०७७ आइतबार १३:२५:७ | रासस

भक्तपुर - सिङ्गो नगरपालिकाको सम्पूर्ण विषय समेट्ने गरी नक्सा तयार पार्न चाँगुनारायण नगरपालिकाले ड्रोनबाट सर्वेक्षण एवं नक्साङ्कन गर्ने कार्य शुरु गरेको छ ।

नगरपालिकाले दुवाकोटबाट ड्रोन उडान शुरु गरेको हो । चाँगुनारायण नगरपालिकाको सबै वस्तुचित्र आउने गरी अबको दुई साता चाँगुनारायण नगरपालिकाको आकाशमा ड्रोन उड्ने नगरप्रमुख सोमप्रसाद मिश्रले जानकारी दिनुभयो ।

नगरपालिकाको लगानीबिना नै इसीमोडलगायत विभिन्न सङ्घसंस्थाको सहयोगमा ड्रोनबाट डिजिटल नक्सा तयार पार्न लागेको बताउँदै उहाँले काठमाडौँ उपत्यकाका सबै स्थानीय तहमा ड्रोन सर्वेक्षण एवं नक्साङ्कन गर्ने उद्देश्य राखेको यस परियोजनाको उपत्यकामा पहिलो परीक्षण सर्वेक्षण चाँगुनारायण नगरपालिकाबाट शुरु भएको जानकारी दिनुभयो ।

नगरप्रमुख मिश्रले भन्नुभयो, ‘विभिन्न सङ्घसंस्थाको सहयोगमा नगरपालिकाको बिनालगानी नगरपालिकाको जिपीएस लोकेशन लिने काम शुरु भएको छ, यसबाट नगरपालिकाभित्र रहेका सम्पूर्ण घर, स्कूल, सडक, जङ्गल, भिरपाखो, जमिन, जग्गा प्लटिङदेखि सबै भौतिक संरचना ड्रोन क्यामराले खिचेर नक्सा तयार पार्ने छ ।’

ड्रोनमा दुई अत्याधुनिक क्यामरा जडान गरी नक्साङ्कन गर्ने काम भइरहेको जानकारी दिँदै डिजिटल नक्सा तयार भएपछि कसैको घरमा पुग्नुपर्दा फोन नं हान्दा घरको ढोकामै पुग्न सकिने उहाँको दावी छ । यसबाट नगरपालिकामा रहेका १२ हजारभन्दा बढी घरधुरी, ६२ दशमलव ९८ स्क्वायर किलोमिटर नगरपालिकाको क्षेत्रफल डिजिटल नक्सामा उत्रिनेछ ।

नक्सा तयार भएपछि नगरपालिकाले आगामी दिनमा सहजरूपमा योजना बनाउन सक्ने, विपद् व्यवस्थापनमा अग्रिम तयारी एवं सहज हुने र नगरपालिकाको विकासमा यसले टेवा पुर्याउने अपेक्षा लिएर सम्बन्धित निकायको अनुमतिमा ड्रोन उडान गरिएको उहाँको भनाइ छ ।

अबको दुई साता आफ्नो घर, आँगन, खेत, बारी, सडकमाथि हवाईजहाजजस्तो देखिने ड्रोनयन्त्र आएमा सहजता अपनाउन नगरवासीलाई नगरप्रमुख मिश्रले आग्रह गर्नुभयो ।

अन्तिम अपडेट: मंसिर ८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

चाँगुनारायणमा ड्रोनमार्फत सर्वेक्षण र नक्साङ्कन

प्रतीकात्मक तस्बिर

तपाईको प्रतिक्रिया