नेपाल–भारत सिमानामा काँडेतार लगाउन माग

वैशाख २८, २०७७ आइतबार २०:४९:२४ | रासस

काठमाण्डाै – नेपाल कम्युनिस्ट पार्टी (नेकपा) निकट विद्यार्थी र युवा सङ्गठनले नेपाल–भारत सिमानामा काँडेतार लगाउन माग गरेका छन् । राष्ट्रिय युवा सङ्घ नेपाल र अनेरास्ववियूले आज परराष्ट्र मन्त्री प्रदीपकुमार ज्ञवालीलाई ज्ञापनपत्र बुझाउँदै नेपालको सिमाना रक्षाका लागि सिमानामा सुरक्षा फौज राख्नुपर्ने र सिमानामा काँडेतार लगाई घेराबार गर्न माग गरेको हो ।

मन्त्री ज्ञवालीलाई सङ्घका संयोजक रामप्रसाद सापकोटा र अनेरास्ववियूका संयोजक ऐन महरको नेतृत्वमा गएको टोलीले मन्त्री ज्ञवालीलाई ज्ञापनपत्र बुझाउँदै भारतसँग सीमासम्बन्धी दीर्घकालीन समस्या समाधान गर्नका लागि उच्च तहबाट निर्णायक पहल गर्नसमेत सरकारलाई अनुरोध गरेको छ । ज्ञापनपत्रमा गएकाे मङ्सिरमा भारतले नेपाली भूमि अतिक्रमण गरी सार्वजनिक गरेको राजनीतिक नक्साको खारेजी र गत वैशाख २६ गते भारतीय पक्षबाट नेपाली भूमि अतिक्रमण गरी बनाइएको सडक सञ्चालन रोक्नका लागि तत्काल कुटनीतिक कदम चाल्नसमेत सरकारलाई आग्रह गरेको छ ।

उनीहरुले भारत पक्षले तावाघाट, लिपुलेक हुँदै मानसरोवरतर्फ जान हाम्रो देशको व्यास गाउँपालिका १ को गुञ्जीदेखि लिपुलेकसम्मको भूभाग मिचेर २२ किलोमिटर लामो बाटो निर्माण गरी शिलान्यास भएको खबरले आक्रोशित बनाएको भन्दै तत्काल कूटनीतिक पहलकदमीबाट यी कदम रोक्न/रोकाउन र सम्पूर्ण नेपालका मिचिएका भूमि फिर्ता गर्न/गराउनसमेत विशेष पहल गर्न माग गरेका छन् ।

विश्व मानव समुदाय कोरोना भाइसरबाट आक्रान्त भएको समय छोपेर इतिहासका तथ्य तथा प्रमाणलाई समेत कुल्चदै असल छिमेकीको सम्बन्धमा समेत प्रश्न उब्जाउने गरी भारतले देखाएको विस्तारवादी रवैया सुगौली सन्धिको समेत विरुद्धमा रहेको उल्लेख गरिएको छ । सन्धिअनुसार महाकाली नदीको पूर्व लिम्पियाधुरा, कालापानी र लिपुलेक नेपालीको भूभाग हो भन्ने स्पष्ट गरेको उल्लेख गर्दै नावी र गुञ्जी नेपालकै टोलीले जनगणना गरेका तथ्यले समेत लिम्पियाधुरा, लिपुलेक र कालापानी नेपाली भूभागमा रहेको स्पष्ट हुने ज्ञापनपत्रमा उल्लेख गरिएको छ ।

अन्तिम अपडेट: मंसिर ९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्