काठमाण्डौ - लिपुलेक, कालापानी क्षेत्रसम्बन्धी सीमा विवादलाई सुझबुझपूर्ण तथा सद्भावयुक्त आपसी संवादबाट टुङगोमा पुर्याउन भूतपूर्व सैनिकहरुले नेपाल सरकारको ध्यानाकर्षण गराएका छन् ।

अल नेपाल भारतीय पूर्व सैनिक कल्याणकारी संघले विज्ञप्ति निकालेर दुई देशबिचको सम्बन्धलाई नै असर पार्ने गरी टिका टिप्पणी गर्दा दीर्घकालीन असर पर्नेतर्फ सचेत रहन आग्रह गरेको छ । साथै नेपाल भारत बीचको पुरानो सम्बन्धलाई कामय राखी खुला वातावरणमा संवाद गरेर निकास निकाल्न संघले आग्रह गरेको छ ।

संघका अध्यक्ष लक्ष्मीकान्त पाण्डेयले जारी गरेको विज्ञप्तिमा विगतमा पनि उतार चढाव आएका बेला वार्ताबाटै समस्या समाधान भएको नजिरलाई कायम राख्दै कुटनैतिक संवाद थाल्नुपर्ने भनिएको छ ।

असंलग्न परराष्ट्रनीति अनुसार सरकारले सीमा समस्या समाधान गर्ने गरी फलदायी परिणाम ल्याउन प्रयास थाल्ने उल्लेख छ ।