काठमाण्डौ – सत्तारुढ नेपाल कम्युनिस्ट पार्टी (नेकपा) को सचिवालय बैठक बसिरहेको छ । पार्टी अध्यक्ष एवं प्रधानमन्त्री केपी शर्मा ओलीको सरकारी निवास बालुवाटारमा बसिरहेको बैठकमा अर्का अध्यक्ष पुष्पकमल दाहाल प्रचण्डसँगै सचिवालयका अरु सदस्यहरुको उपस्थिति छ । 

बैठकमा लामो समयदेखि विवादमा रहेको अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) सहित समसामयिक राजनीतिक विषयमा छलफल भैरहेको छ । प्रधानमन्त्रीसमेत रहेका अध्यक्ष ओली संसदबाट एमसीसी पारित गर्ने पक्षमा हुनुहुन्छ भने अर्का अध्यक्ष पुष्पकमल दाहाल ‘प्रचण्ड’ कार्यदलको सुझाव अनुसार अगाडि बढ्नुपर्ने अडानमा हुनुहुन्छ । 

प्रचण्डसहितका नेताले कार्यदलले बनाएको प्रतिवेदनमाथि स्थायी समितिमा छलफल गर्नुपर्ने बताउँदै आएका छन् । कार्यदलले तयार पारेको प्रतिवेदनमा एमसीसी परिमार्जन गरेर मात्र संसदबाट पारित गर्नुपर्ने सुझाव दिइएको छ ।