काठमाडौं - संसदीय सुनुवाइ विशेष समितिले प्रधानन्यायाधीशमा सिफारिस दीपकराज जोशीको नाम अस्वीकृत गरेपछि नयाँ प्रधानन्यायाधीशको लाइनमा ओम प्रकाश मिश्र हुनुहुन्छ । न्याय परिषदले जोशीसहित मिश्र र चोलेन्द्र शमशेर जबराको नाम संवैधानिक परिषदमा सिफारिस गरेको थियो ।

जोशीपछि रोलक्रममा मिश्र हुनुभएकाले अबको प्रधानन्यायाधीश उहाँ हुने सम्भावना छ । मिश्र प्रधानन्यायाधीश भएमा उमेरहदका कारण उहाँले आउँदो पुससम्म मात्र जिम्मेवारी सम्हाल्नुहुनेछ । मिश्र २०७१ सालको जेठमा सर्वोच्चको न्यायाधीशमा नियुक्त हुनुभएको थियो ।

मिश्रपछि साढे तीन वर्षका लागि चोलेन्द्र शमशेर जबरा प्रधानन्यायाधीशको लाइनमा हुनुहुन्छ । 

चोलेन्द्रपछि वरिष्ठताक्रममा दीपककुमार कार्की, केदारप्रसाद चालिसे, सारदाप्रसाद घिमिरे, मीरा खड्काको पालो आउँछ । तर उमेरहद्का कारण उनीहरुले अवकाश पाइसक्ने भएकाले त्यसपछिको प्रधानन्यायाधीशमा हरिकृष्ण कार्कीको पालो आउनेछ ।