काठमाण्डाै – नेपालमा कोरोना भाइरसकाे सङ्क्रमणबाट थप एक जनाको मृत्यु भएको छ । 

स्वास्थ्य तथा जनसङ्ख्या मन्त्रालयका अनुसार बाग्लुङका २९ वर्षीय पुरुषको कोरोनाकाे कारण मृत्यु भएको हो । बाग्लुङको निसिखोला गाउँपालिका ३ का २९ वर्षीय पुरुषको २१ गते क्वरेण्टीनमा मृत्यु भएको हो ।

भारतबाट क्षयरोगको उपचार गराएर फर्किनुभएका उहाँको ढोरपाटन नगरपालिकाको क्वरेण्टीनमा मृत्यु भएको मन्त्रालयका प्रवक्ता डाक्टर जागेश्वर गौतमले बताउनुभयो । योसँगै नेपालमा कोरोनाबाट मृत्यु हुनेको सङ्ख्या ३५ पुगेकाे छ ।

सोमबार नेपालमा थप एक सय ८० जनामा कोरोना सङ्क्रमण देखिएको छ । योसँगै कोरोना सङ्क्रमितको सङ्ख्या १५ हजार नाै सय ६४ पुगेको छ । काठमाण्डाै उपत्यकामा मात्रै सोमबार ५४ जना सङ्क्रमित थपिएका छन् । प्रवक्ता गौतमका अनुसार काठमाण्डाैमा २४, ललितपुरमा २० र भक्तपुरमा १० जनामा सङ्क्रमण देखिएको छ ।

सोमबार दुई सय ६४ जना सङ्क्रमित निको भएर घर फर्किएका छन् । सोमबारसम्म सङ्क्रमणमुक्त भएर ६ हजार आठ सय ११ जना डिस्चार्ज भएको उहाँले बताउनुभयो ।