काठमाण्डौ – कोरोनाको त्रास । डरको अगाडि मानवता कसरी मौन हुन्छ भन्ने कुरा भारतको कर्नाटकमा भएको एक घटनाले देखाएको छ ।

कर्नाटकको बेलगाम जिल्लाबाट मन चसक्क घोच्ने भिडियाे बाहिर आएको छ । एक महिला ठेलामा श्रीमानको शवलाई बोकेर अन्तिम संस्कारको लागि जाँदैछिन् । सबैलाई कोरोना भाइरसको डरले सताइरहेको थियो, त्यसैले ती महिलालाई सहयोग गर्न कोही पनि अघि सरेनन् ।

भारतीय सञ्चारमाध्यमले जनाएअनुसार आफ्ना दुई छोरालाई साथमा लिएर ती महिला लोग्नेको शवलाई ठेलामा बोकेर अन्तिम संस्कारको लागि गएकी हुन् ।

स्थानीयबासिन्दाले बताएअनुसार ती महिलाको परिवारमा आर्थिक समस्या छ । एम्बुलेन्समा लैजानको लागि पैसा नभएका कारण उनले त्यसरी ठेलामा राखेर लगेकी हुन् ।

ती महिलाका ५५ वर्षीय श्रीमान् सदाशिव हिरत्तीको घरमै ज्यान गएको हो । मुटु सम्बन्धी बिमारीका कारण उनको ज्यान गएको बताइएको छ ।

एकजना स्थानीयका अनुसार ती महिलाले सहयोग माग्दा कसैले सहयोग नगरेपछि श्रीमानको शवलाई कपडामा बेरेर अन्तिम संस्कारको लागि लगेकी हुन् ।

A woman in Belgaum used a push cart to move her husband's dead body , no one helped as they feared the husband to have died due to #Covid19 pic.twitter.com/fdcfGPAhYE

— Nagarjun Dwarakanath (@nagarjund) July 18, 2020