खोला तथा नदीबाट बालुवा उत्खनन् र निकासी रोकिएन

साउन २०, २०७५ आइतबार १९:१५:५२ | शिव ढुंगाना

ओखलढुंगा – जिल्लाभित्रका नदी तथा खोलामा बालुवा उत्खनन् र निकासी रोकिएको छैन ।

सरकारले नदी तथा खोलाजन्य निकासीमा रोक लगाए पनि जिल्लाका विभिन्न खोला तथा नदीबाट गिट्टी तथा बालुवा उत्खनन् र निकासी भइरहेको छ ।

स्थानीय सरकारको पुर्जी र रसिदकै आधारमा अघिल्लो आर्थिक वर्षमा ठेक्का लिएका र पटके काटेर निकासी गदै आएका व्यक्तिले चालु आर्थिक वर्षमा समेत निकासी गर्दै आएका छन् ।

जिल्लाभित्रको मोलुङ, ठोट्ने खोला र दुधकोसीबाट दैनिक निकासी भइरहेको छ । प्रहरीले बालुवा बोकेका सवारी नियन्त्रणमा लिए पनि स्थानीय सरकारका सिफारिस र रसिद भेटिएपछि छोड्ने गरेको छ ।

चौतर्फी गुनासो बढेपछि ट्याक्टर तथा ट्रक नियन्त्रणमा लिएर अनुसन्धान गर्दा स्थानीय तहबाटै पुर्जी दिइएको पाइएको जिल्ला प्रहरी कार्यालय ओखलढुंगाले जनाएको छ ।

प्रहरी कार्यालयका प्रमुख प्रहरी नायव उपरीक्षक अनन्तराम शर्माले बालुवा बोकेका सवारी नियन्त्रण लिँदा कागज भेटेपछि सम्झाएर पठाउने गरेको बताउनुभयो ।

‘स्थानीय सरकारले रोक्नुपर्ने हो, रसिद र पुर्जी दिएपछि कसरी नियन्त्रण हुन्छ रु’ उहाँले प्रश्न गर्नुभयो ।

प्रहरीले जिल्ला समन्वय समिति र गाउँपालिकाले दिएको रसिदको ठेली नै निकासीकर्ताबाट जफत गरेको पनि प्रनाउ शर्माले बताउनुभयो ।

प्रहरीले जिल्ला समन्वय समिति, चिसंखुगढी र मानेभञ्ज्यांग गाउँपालिकाले दिएको रसिद भेटिएको जनाएको छ । वर्षायाममा सरकारले प्राकृतिक प्रकोप लगायतका विपद् निम्तने भएकाले नदीजन्य वस्तु निकासीमा रोक लगाउने गर्छ । तर, ओखलढुंगामा रोक लगाइएको भनिए पनि उत्खनन् र निकासी भइरहेको छ ।

साउनमा समेत सरकारी निकायकै रसिदका आधारमा निकासी भएको पाइएपछि जनप्रतिनिधीको मिलेमतोको आशका गरिएको छ ।

स्थानीय सरकारका रसिदका आधारमा निकासी भएपछि प्रहरी समेत कडाइ गर्न हच्किएको छ ।

जिम्मेवार बन्नु पर्ने निकायबाटै रसिद दिएर निकासी भइरहेकाले प्रहरीले मात्रै केही गर्न नसक्ने जिल्ला प्रहरी कार्यालयका सुचना अधिकारी निरञ्जन भट्टराईको भनाइ छ ।

चिसंखुगढीको भदौरे र दियाले, मानेभञ्ज्यांगको मोली, मोलुंगको कुन्तादेवी र च्यानम लगायतका क्षेत्रमा बालुवा उत्खनन् गरेर निकासी भएको पाइएको छ ।

स्थानीय सरकारका प्रमुखहरुले यसबारेमा अनभिज्ञता प्रकट गर्दै आएका छन् । चिसंखुगढीका प्रमुख प्रशासकीय अधिकृत सुवास निरौलाले निकासीबारे अध्ययन गरेर अघि बढ्ने बताउनुभएको छ ।

अन्तिम अपडेट: मंसिर ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

शिव ढुंगाना

शिव ढुंगाना ओखलढुंगाका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्