बहराइनको टोलीलाई मनास्लु आरोहणको अनुमति, १९ लाख रुपैयाँ रोयल्टी सङ्कलन

 असोज ६, २०७७ मंगलबार १७:१३:२७ | उज्यालो सहकर्मी
unn.prixa.net

काठमाण्डौ – बहराइनका राजपरिवारका सदस्यसहित १८ जनाकाे टाेलीले मनास्लु हिमाल आरोहणको अनुमति पाएकाे छ । बहराइनका १५ जना र बेलायतका तीन जना गरी १८ जनाले आठ हजार एक सय ६३ मिटर अग्लो मनास्लु हिमाल आरोहणको अनुमति पाएको पर्यटन विभागले जनाएको छ । 

‘एउटै टिममा १५ जनाभन्दा धेरैलाई अनुमति दिन नमिल्ने भएकाले नौ÷नौ जनाको दरले दुई टिम बनाएर उहाँहरुले अनुमति पाउनुभएको छ, अब उहाँहरु आरोहणको लागि योग्य हुनहुुन्छ’, विभागको पर्वतारोहण शाखाकी निर्देशक मीरा आचार्यले उज्यालो अनलाइनसँग भन्नुभयो । 

उनीहरुबाट १६ हजार दुई सय डलर अर्थात् १८ लाख ९७ हजार रुपैयाँभन्दा धेरै रोयल्टी सङ्कलन भएको पनि उहाँले बताउनुभयो । 

सात दिन क्वरेण्टीनमा बस्नैपर्ने नियमअनुसार भदौ ३१ गते बुधबार नेपाल आएको टोलीले सात दिनको क्वरेण्टीन बसाइ पनि पूरा गरेको छ । 

उनीहरु सबैको पीसीआर रिपोर्ट नेगेटिभ आएकाले अनुमति दिइएको विभागकी निर्देशक मीरा आचार्यले जानकारी दिनुभयो ।  

काेराेना भाइरसकाे कारण नेपालमा लगाइएकाे लकडाउनपछि हिमाल आराेहण गर्न आउने याे पहिलाे विदेशी टाेली हाे । 

अन्तिम अपडेट: चैत १४, २०८०

तपाईको प्रतिक्रिया