डोटीको लामीखाल र जाजरकोटको हलचौरमा बिजुली पुगेपछि गाउँ उज्यालो भएका छन् ।

डोटीको पश्चिमी क्षेत्र आदर्श गाउँपालिका वडा नम्बर ५ लामिखालमा पहिलो पटक राष्ट्रिय प्रसारणको विद्युत लाइन पुगेको छ । विद्युत लाइन विस्तारसँगै लामिखालका गाउँ झिलिमिली भएका छन् ।

लाइन विस्तारसँगै झण्डै चार सय घरधुरीले विद्युत् सेवा पाएका गाउँपालिका अध्यक्ष टेकबहादुर रोकायाले बताउनुभयो । पोल गाडेको वर्षौपछि गाउँपालिकाको पहलमा लामिखालमा राष्ट्रिय प्रसारण लाइनको पहुँच पुगेको हो । बिजुली नहुँदा उज्यालोका लागि सल्लाको दियालो तथा टुकीको भर पर्नुपरेको तर अहिले झलमल्ल भएको स्थानियबासिन्दा धनबहादुर नेपालीले बताउनुभयो ।

अहिले गाउँपालिकाको केन्द्रसम्म बिजुली बिस्तार गरिएको र क्रमसः बिजुली नपुगेका अरु गाउँहरुमा पनि बिस्तार गर्दै जाने अध्यक्ष रोकायाले जानकारी दिनुभयो ।

यस्तै जाजरकोटको नलगाड नगरपालिका–८ हलचौरमा लाइन बिस्तार भएसँगै गाउँ उज्यालो भएको छ । हलचौरका झण्डै पाँचसय घरधुरीले बिजुली बाल्न पाएका हुन् ।

स्थानीय खुमाउरी खोला जलविद्युत आयोजनाबाट उत्पादन गरिएको विद्युत बढी भई खेर गएको अवस्थामा हलचौरमा लाइन बिस्तार गरी बिजुली प्रयोग गरिएको छ ।