काठमाण्डाै – काठमाण्डाै महानगरपालिकाले कान्ति बाल अस्पताललाई एक थान पीसीआर मेसिन हस्तान्तरण गरेको छ ।

काठमाण्डाै महानगरपालिकासँग भगिनी सम्बन्ध स्थापित चीनको नानजिङ सहरले दिएका दुई मध्ये एक थान पीसीआर मेसिन कान्ति बाल अस्पताललाई आज हस्तान्तरण गरेको हो । झण्डै १६ लाख पर्ने सो मेसिन हस्तान्तरणपछि महानगरपालिका प्रमुख विद्यासुन्दर शाक्यले जति सक्दो छिटो मेसिन जडान गरी सेवा सुरु गर्न अस्पताललाई आग्रह गर्नुभयो ।

शाक्यले सेवा कसले दिने भन्दा पनि सबैले मिलेर सेवा दिनुपर्छ भन्ने मान्यताका साथ हामीले यस्ता अत्यावश्यक सामग्री विरामीको बढी चाप रहेका अस्पतालहरुलाई हस्तान्तरण गर्दै आएको र यो तेस्रो चरणको हस्तान्तरण कार्यक्रम भएको बताउनुभयाे ।

शाक्यले यस अघि पनि काठमाण्डाै महानगरपालिकाले थापाथलीको परोपकार प्रसूति तथा स्त्री रोग अस्पतालमा पीसीआर मेसिनसहितका अत्यावश्यक सामग्री हस्तान्तरण गरेको जानकारी दिनुभयो । कान्ति बालअस्पतालका निर्देशक डाक्टर कृष्णप्रसाद पौडेलले महामारीविरुद्धको लडाईं लडिरहेका बेला काठमाण्डाै महानगरपालिकाले गरेको यो ठूलो सहयोग भएको बताउनुभयो ।

पौडेलले अहिले पनि दैनिक २० देखि ३० जनासम्मको परीक्षणका लागि नमूना अन्य ल्याबमा पठाउनु पर्ने बाध्यता रहेको भन्दै अब अस्पतालमै मेसिन जोडेपछि त्यो समस्या हट्ने बताउनुभयो ।