ललितपुर - ललितपुरको लेलेमा रहेको मनकामनामाई मन्दिरको निर्माणको काम भइरहेको छ। 

२०६२ सालमा जनश्रमदानबाट निर्माण सुरु भएको मन्दिर क्षेत्रमा अहिले पनि वरिपरिको पर्खालमाथि ढलान, तारजाली, बस्ने कुर्ची, धारा जडान र मर्मत सुधारको कार्य भइरहेको हो । गोरखाको मनकामनामाईको वैकल्पिक रुपमा स्थापना गरिएको मन्दिर १५ वर्षअघि तीन लाख जनश्रमदान र दुई लाख रुपैयाँ बराबरको जिन्सी सामान उठाएर सुरु गरिएको थियो । 

२०६४ साल वैशाख २२ गते मन्दिर उद्घाटन गरेको मनकामना फूल्चोकीमाई मन्दिर संरक्षण तथा सुधार समितिका अध्यक्ष राजेन्द्र सिलवालले बताउनुभयो । मन्दिर निर्माण सुरु गरेपछि पूर्णता दिन पैसा नभएर समस्या हुँदै आएको उहाँको भनाइ छ । मन्दिरमा पुग्न सिँढी निर्माणका लागि गोदावरी नगरपालिकाले गएकाे वर्ष १० लाख र यसवर्ष पनि पोखरी निर्माणका लागि १० लाख रुपैयाँ सहयोग गरेको छ । 

नगरपालिकाले सहयोग गरेको रकम र व्यक्तिले दिएको रकम गरेर अहिलेसम्म एक करोड बढी खर्च भइसकेको मन्दिरका संस्थापक अध्यक्ष ठूलाबहादुर तामाङले बताउनुभयो ।