टीकापुर घटनाको तीन वर्ष : पीडितको रोकिएन आँशु

भदौ ७, २०७५ बिहीबार १६:३१:४८ | रासस

कञ्चनपुर – शुक्लाफाँटा नगरपालिका–६ सिमलफाँटाका ६२ वर्षीया सीतादेवी नेगीले तीन वर्षअघि आजकै दिन कैलालीको टीकापुर घटनामा छोरो गुमाउनुभयो । नेपाल प्रहरीमा जागिरे छोरो गुमाए यता नेगी परिवारको विचल्ली भएको छ ।

बुढेसकालको भरोसा मानेको जेठो छोरो जनकबहादुरलाई गुमाएयता सीतादेवीको आँशु रोकिएको छैन । उहाँको घरमा पुग्दा वृद्धा नेगी घाँस काट्दै हुनुहुन्थ्यो । ‘छोरो गुमाएयता बिरामी नै परे, हरेक दिन खाना पस्केर खान बस्दा छोरालाई नै सम्झिन्छु’, सीतादेवीले आँशु झार्दै भन्नुभयो ।

छोरा मारिएको तीन वर्ष बितिसक्दा पनि घटनाका दोषीलाई कारबाही हुन नसकेको भन्दै उहाँले दुःख मनाउ गर्नुभयो ।

टीकापुर घटनापछि प्रहरी हवल्दार जनकबहादुरकी श्रीमती परमादेवीले पाँच सन्तानका साथ माइतमा आश्रय लिनुभएको छ । दाजु मारिएपछि सीतादेवीको कान्छो छोरो उमेश वैदेशिक रोजगारबाट फर्किएर अहिले घरमा बेरोजगार बन्नुभएको छ । ‘परिवारको भरोसा नै जेठो छोरा जनक थियो’, सीतादेवीले भन्नुभयो ।

कान्छो छोराको सहारामा बाँचेको नेगी परिवारको आर्थिक अवस्था कमजोर बन्दै गएको छ । ‘बुढेसकालमा भरोसा गुमाउँदा परिवारमै विचलन आयो’, जनकका बुबा वीरसिंहले भन्नुभयो, ‘कहीँकतैबाटै सहयोग पाउन सकिएन, दोषीलाई कारबाही भएको देख्न पाए हुन्थ्यो ।’ टीकापुर घटनामा संलग्न २२ जनालाई समातेको सुन्नमा आएपनि सजाय के भयो थाहा नपाएको उहाँ बताउनुहुन्छ ।

घटनापछि बुहारी परमादेवी भीमदत्तनगरपालिका–१९ बागफाँटामा माइतकहाँ बस्दै आउनुभएको छ । ‘छोरो गुमाएपछि सरकारले उपलब्ध गराएको रकमबाट नाति÷नातिनीको खर्च चलाएको छ’, बुबा वीरसिंहले भन्नुभयो । नेगी परिवार राहत र न्यायको पर्खाइमा छ । आफूसित भएको चार कट्ठा जमिनमा खेती फलाएर परिवारको छाक टार्न मुश्किल भएको उहाँ बताउनुहुन्छ ।

यस्तै टीकापुर घटनामै ज्यान गुमाएका प्रहरी निरीक्षक बलराम विष्टको परिवारको पनि आँशु अझै थामिएको छैन । शुक्लाफाँटा नगरपालिका–११ कलुवार घर भएका विष्टकी श्रीमती मन्धरादेवी घटनापछि अहिलेसम्म घर बाहिर निस्कनुभएको छैन । पतिवियोगको पीडा झेल्दै आउनुभएकी उहाँले पीडकलाई कारवाही गर्न भएको ढिलाइप्रति दुखेसो पोख्नुभयो ।

‘घटना भएको तीन वर्ष भयाे, म घर बाहिर निस्कन सकिरहेको छैन’, उहाँले भन्नुभयो, ‘श्रीमानले त्यत्तिक्कै ज्यान गुमाउनुभयो, चित्त बुझाउने ठाउँ छैन ।’ घटना हुँदा पीडित परिवारका छोरा-छोरीलाई सरकारले निःशुल्क शिक्षा दिने भने पनि हालसम्म केही सुनुवाइ नभएको मन्धरादेवीे बताउनुहुन्छ । उहाँका छोरा÷छोरी बुबाले पाउने सुविधाबाटै अध्ययन खर्च गर्दैछन् । उहाँले भन्नुभयो, ‘छोरा-छोरीको पढाइप्रति सरकार गम्भीर बनोस् ।’

त्यसैगरी टीकापुर घटनामै ज्यान गुमाएका बेलौरी नगरपालिका–६ विद्यानगरका प्रहरी निरीक्षक केशव बोहराको परिवार पनि हत्यामा संलग्नलाई कारवाही नभएकोप्रति निराश छ । बोहराका श्रीमती र छोरा-छोरी काठमाडौँमा बस्दै आएका छन् । घरमा भेटिनुभएका बोहराका भाइ महेश दोषीलाई कारवाही भएमात्रै मृत आत्माले शान्ति पाउने बताउनुहुन्छ ।

‘यति ठूलो घटनाका दोषीलाई कारवाही गर्न सरकार गम्भीर भएको देखिएन ।’ उहाँले भन्नुभयो, ‘पीडकलाई राजनीतिक कारण देखाएर उन्मुक्ति दिन हुँदैन ।’ घटनाका मुख्य आरोपी निर्वाचनमा सहभागी भएकोप्रति उहाँले दुःख व्यक्त गर्नुभयो ।

‘कारबाही हुनुपर्ने मान्छेलाई संरक्षण दिनु हुँदैन’, उहाँले भन्नुभयो । विसं २०७२ भदौ ७ गते भएको टीकापुर घटनामा वरिष्ठ प्रहरी उपरीक्षक लक्ष्मण न्यौपाने, प्रहरी निरीक्षकद्वय बलराम विष्ट र केशव बोहरासहित आठ प्रहरी र एक बालकले ज्यान गुमाएका थिए । उक्त घटनाको मुद्दा हाल कैलाली जिल्ला अदालतमा चलिरहेको छ ।

घटनाका अभियुक्तमध्ये २३ जना कैलाली कारागार र मुख्य आरोपी रेशमलाल चौधरी केन्द्रीय कारागार काठमाडौंमै पुर्पक्षका लागि थुनामा छन् । अभियुक्तका आश्रित दुई बालबालिका पोखराको बाल सुधारगृहमा छन् ।

अन्तिम अपडेट: मंसिर ९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्