काठमाण्डाै – प्यालेस्टिनी विद्रोही समूह हमासका एक वरिष्ठ अधिकारीले इजरायल र गाजाको विद्रोहीबीच एक–दुई दिनमा युद्धविराम हुन सक्ने बताएका छन् ।

यद्यपि इजरायलका प्रधानमन्त्री बिन्यामिन नेतान्हायुले भन्नुभएको छ, ‘इजरायली नागरिकको शान्ति र सुरक्षा सुनिश्चित नभएसम्म कारबाही चलिरहन्छ ।’

यसैबीच दुवै पक्षबीच लगाता एघार दिनदेखि आक्रमण भइरहेको छ । बिहीवार बिहान इजरायलले गाजामा हमास समूहको अड्डामा एक सयभन्दा धेरै आक्रमण गरेको छ ।   

प्यालेस्टिनी विद्रोहीले पनि जवाफी कारबाही गर्दै इजरायलमाथि रकेट प्रहार गरेका छन् ।   

जेरुसेलममा रहेको अल–अक्सा मस्जिदमा जान प्रतिबन्ध लगाइएपछि प्यालेस्टिनी नागरिक रिसाएपछि यहाँ हिंसा भड्किएको थियो । दुवैले यसलाई पवित्र स्थल मान्छन् ।   

हमास नेताले के भने ?  

हमासको राजनीतिक शाखाका नेता मूसा अबू मार्जूकले लेबनानको अल–मयादीन टीभीसँग भने, ‘मलाई लाग्छ दुवै पक्षबीच सङ्घर्षविराम गराउने प्रयास सफल रहन्छ ।’

उनले भने, ‘एक–दुई दिनभित्र सङ्घर्षविराम हुन सक्ने मलाई आशा छ र यो आपसी सहमतिबाट हुनेछ ।’

दुवै पक्षलाई सङ्घर्षविरामका लागि अन्तर्राष्ट्रिय दबाब बढेपछि हमास नेताको यो भनाइ आएको हो । 

बिहीवार दुवै पक्षबीच लगातार ११ दिनदेखि आक्रमण चलिरहेको छ । बिहीवार बिहान इजरायलले गाजामा हमास समूहको अड्डामा एक सयभन्दा धेरै आक्रमण गरेको छ । प्यालेस्टिनी विद्रोहीले पनि जवाफी कारबाही गर्दै इजरायलमाथि रकेट प्रहार गरेका छन् । बुधवार पनि दुवै पक्षमा यस्तै आक्रमण भएको थियो । 

१० दिनदेखि चलिरहेको हिंसामा गाजामा अहिलेसम्म कम्तीमा दुई सय २७ जनाको ज्यान गएको बीबीसीले जनाएको छ । गाजामा नियन्त्रण गर्ने हमासको स्वास्थ्य मन्त्रालयका अनुसार ज्यान गुमाउनेमा झन्डै सय जना महिला र बालबालिका छन् ।

इजरायलले गाजामा ज्यान गुमाउनेमा कम्तीमा एक सय ५० विद्रोही पनि रहेको बताएको छ । हमासले आफ्ना समूहका व्यक्तिको ज्यान गएकोबारेमा कुनै आँकडा दिएको छैन ।  

इजरायलकाअनुसार त्यहाँ दुई बालबालिकासहित १२ जनाको ज्यान गएको छ ।