काठमाण्डाै – रुखलाई अँगालो हालेर संरक्षणको सन्देश दिने 'चिपकाे' आन्दोलनका प्रणेता एवम् पर्यावरणविद् सुन्दरलाल बहुगुणाको कोरोना भाइरसकाे सङ्क्रमणबाट निधन भएको छ ।

९४ वर्षीय बहुगुणाको उपचारका क्रममा शुक्रवार (आज) निधन भएको भारतीय पत्रिका हिन्दुस्तान टाइम्सले जनाएको छ । उहाँ १३ दिनअघि अस्पताल भर्ना हुनुभएको थियो । उहाँ उच्च रक्तचाप र मधुमेह रोगबाट पिडित हुनुहुन्थ्यो ।

बहुगुणाले सन् १९७० मा रुखलाई अँगालो हालेर संरक्षणको सन्देश 'चिप्को' आन्दोलन सुरु गर्नुभएको हो । उत्तराखण्डबाट सुरु भएको आन्दोलन भारतको सबैजसो पहाडी क्षेत्रमा फैलिएको थियो । जसमा महिलाहरूको सहभागिता उल्लेख्य रहेको थियो ।

भारतमा कोरोना महामारीका बेला अक्सिजनको चरम अभाव भइरहेका बेला उहाँको अभियानलाई धेरैले सम्झिएका थिए । बहुगुणालाई भारत सरकारले सन् १९८१ मा पद्मश्री र सन् २००९ मा पद्म विभूषण पुरस्कार प्रदान गरेको थियो ।