काठमाण्डौ – फिलिपिन्समा ९२ जना सैनिक सवार एउटा मालवाहक विमान आइतवार दुर्घटनाग्रस्त भएको छ । 

फिलिपिन्सको दक्षिण–पश्चिममा रहेको सुलु प्रान्तको जोलो टापुमा सी–३० विमान अवतरण गर्ने प्रयास गरिरहेको समयमा दुर्घटनाग्रस्त भएको खबर आइरहेका छन् । 

सुरक्षा बलका प्रमुख किरिलिटो सोबेजानाले जलिरहेको विमानको भग्नावशेषबाट कम्तीमा ४० जनालाई उद्धार गरिएर अस्पताल पुर्‍याइएकाे र अहिलेसम्म दुर्घटनास्थलबाट १७ जनाको शव झिकिएको बताइएको छ । 

स्थानीय सञ्चारमाध्यमले खिचेका तस्बिरमा दुर्घटनाग्रस्त विमानमा भुँइमा बजारिएसँगै आगलागी भएको देखिएको छ । विमान दुर्घटनाग्रस्त भएको नजिकै घरहरू माथि बाक्लो कालो धुँवा देखिएको छ । 

सुरक्षा बलका प्रमुख सोबेजानाले भन्नुभयो, ‘राहतसहित उद्धारकर्मी घटनास्थानलमा छन् । यो निकै दुर्भाग्यपूर्ण छ । विमानले रनवे छोड्यो, फेरि उड्न खोज्यो तर नसक्दा दुर्घटना भयो ।’   

स्थानीय समयअनुसार साढे ११ बजे दुर्घटनामा परेको विमानमा सवार धेरैजसाे आधारभूत सैनिक तालिम पूरा गर्ने व्यक्तिहरू भएको बताइएकाे छ ।