काठमाण्डाै – अफगानिस्तानको सेनाले पश्चिम बदगिस प्रान्तमा तालिबान लडाकुले कब्जा गरेको सहर आफ्नो नियन्त्रणमा आएको दाबी गरेको छ ।

हिजो बुधवार दिउँसो तालिबानले कला–ए–नाव सहरका सरकारी भवन कब्जामा लिएर चार सय बन्दीलाई जेलबाट भगाएका थिए भने कैयौँ ठूला सरकारी भवन पनि नियन्त्रणमा राखेका थिए । तर घण्टौँसम्मको सङ्घर्षपछि सरकारी सेनाले आफूहरूले विजयी प्राप्त गरेको जनाएको बीबीसीले जनाएको छ ।

अमेरिकी सेना फिर्ता हुन थालेपछि तालिबानले कुनै पनि प्रान्तमा सिधै आक्रमण गरेको यो नै पहिलो घटना हो । तर सरकारी सेनाले विशेष बलसहितको हवाई आक्रमण गरेर क्षेत्र नियन्त्रणमा लिएको समाचार संस्था रोयटर्सले जनाएको छ ।

स्पेसल फोर्स कमान्डर सैयद निजामीले आक्रमणमा तालिबानतर्फ ठूलो क्षति भएको र आफूहरू अझै उत्साहित रहेको बताउनुभएको छ ।

अफगानिस्तानबाट अमेरिकी सेना फर्कन थालेसँगै तालिबानले आक्रमणका घटना बढाएको छ । आउँदो सेप्टेम्बर ११ तारिखसम्म सबै अमेरिकी सैनिक स्वदेश फर्कने योजना रहेको छ ।