काठमाण्डाै – सभामुख अग्निप्रसाद सापकोटाले वृहत्तर राष्ट्रिय एकताको खाँचो रहेको बताउनुभएको छ । आइतबारदेखि सुरु हुने सङ्घीय संसदको अधिवेशनको तयारी सम्बन्धमा सङ्घीय संसद् भवन नयाँ बानेश्वरमा निरीक्षणका लागि पुग्नुभएका सभामुख सापकोटाले सञ्चारकर्मीसँग कुरा गर्दै राजनीतिक दलहरूबीचमा वृहत्तर राष्ट्रिय एकता आवश्यक रहेको बताउनुभएको हो । 

उहाँले नेपालीको आत्मनिर्णयको अधिकार प्रयोग गरेर अगाडि बढ्न तथा संविधान जारी भएसँगै नागरिकले राखेका आशालाई विश्वासमा परिणत गर्नका लागि वृहत् राष्ट्रिय एकताको खाँचो रहेको बताउनुभयो ।

सभामुख सापकाेटाले भन्नुभयो, ‘अहिले समग्र स्थितिलाई हेर्दा, समग्र राष्ट्रिय परिस्थितिलाई विचार गर्दा फेरि पनि वृहत्तर राष्ट्रिय एकताको खाँचो छ । किनभने हामीले आफ्नो आत्मनिर्णयको अधिकार प्रयोग गर्दै अगाडि बढ्नका लागि अनि त्यसपछि नागरिकले जुन आशा गरेका थिए संविधान जारी भइसकेपछि ती सबै नागरिककाे आशालाई विश्वासमा परिणत गर्नका लागि र हरेक हिसाबले वृहत् राष्ट्रिय एकताको खाँचो छ । त्यो वृहत् राष्ट्रिय एकता कायम गर्नका लागि मुख्यतः पार्टीहरूको भूमिका हुन्छ ।’

उहाँले वृहत् राष्ट्रिय एकताको शक्तिशाली सन्देश दिने थलो प्रतिनिधि सभा भएको र प्रतिनिधि सभाबाट राष्ट्रिय एकताको सन्देश दिनुपर्ने पनि बताउनुभयो । उहाँले भन्नुभयो ‘वृहत् राष्ट्रिय एकताको शक्तिशाली सन्देश दिने थलो चाहिँ प्रतिनिधि सभा हो । यहाँबाट त्यो सन्देश दिनुपर्छ भन्ने मेरो मत छ ।’   

सभामुख सापकोटाले राष्ट्रिय एकता कायम गर्न आफूले इमान्दारितापूर्वक र निष्ठाका साथ समन्वय गर्ने पनि बताउनुभयो । उहाँले संसद् बैठक व्यवस्थित ढङ्गले गर्ने पनि बताउनुभयो ।