मनाङमा १८ वर्ष माथिका सबै नागरिकले लगाए कोरोना विरुद्धको खोप

साउन २०, २०७८ बुधबार १२:१७:२७ | उज्यालो सहकर्मी

मनाङ – हिमाली जिल्ला मनाङका १८ वर्षमाथिका सबै नागरिकले कोरोना विरुद्धको खोप लगाएका छन् । अठार वर्षभन्दा माथिका सबै नागरिकलाई खोपको दुवै मात्रा लगाइएको स्वास्थ्य कार्यालय मनाङका प्रमुख बद्री आचार्यले जानकारी दिनुभयो । अठार वर्षमाथिका सबैलाई कोरोनाविरुद्धको खोप लगाउने पहिलो जिल्ला मनाङ बनेको छ ।

उहाँका अनुसार जिल्लाका चार हजार एक सय ९८ जनालाई कोरोना खोप लगाइएको छ । तीमध्ये एक सय ६५ जनाले कोभिशिल्डको दोस्रो खोप लगाउन बाँकी रहेको आचार्यले बताउनुभयो । मनाङमा दुई हजार ९६ जनाले एस्ट्राजेनेकाको कोभिशिल्ड खोप, दुई हजार २७ जनाले जोन्सन एण्ड जोन्सनको खोप र ७५ जनाले भेरोसेलको पूर्ण खोप लगाएको आचार्यले बताउनुभयो । स्वास्थ्य कार्यालयले मनाङमा खोप लगाउन योग्य नागरिक छ हजार दुई सय रहेको बताएको थियो । अन्य नागरिक कामको सिलसिलामा देशविदेशमा रहेकाले खोप लगाउनेको सङ्ख्या चार हजार एक सय ९८ रहेको आचार्यले जानकारी दिनुभयो । जिल्ला बाहिर रहेकाहरु आएमा उनीहरुलाई पनि स्वास्थ्य कार्यालयले खोप उपलब्ध गराउने व्यवस्था गरेको उहाँले बताउनुभयो ।

देशैभर खोपको अभाव रहेको अवस्थामा खोप लगाउन पाउँदा खुशी लागेको जिल्लाका पर्यटन व्यवसायी विनोद गुरुङ बताउनुहुन्छ । उहाँका अनुसार नागरिकले कोराेनाको सङ्क्रमण जोखिममा खोप लगाउन पाएकोमा सुरक्षित महसुस गरेका छन् । प्राकृतिक विपद् र विश्वव्यापी महामारीले मानवीय क्षति हुन नदिन दुर्गम जिल्ला मनाङलाई मागअनुसारको खोप उपलब्ध गराएको गण्डकीका स्वास्थ्यमन्त्री मधुमाया अधिकारी गुरुङले बताउनुभयो ।

उहाँले भन्नुभयाे, “प्रदेशका सबै जिल्लामा कोरोनाविरुद्धको पूर्ण मात्रा खोप पुर्याउने लक्ष्य हो, तर विकट जिल्ला मनाङलाई प्राथमिकतामा राखेर खोप उपलब्ध गरायौँ, अन्य जिल्लालाई पनि पूर्णरुपमा खोप उपलब्ध गराउने कसरतमा छौँ ।”

मनाङमा बाढीपहिराको जोखिममा रहेको अवस्थामा कोरोना विरुद्धको खोप ढुवानीका लागि नेपाली सेनाले सहयोग गरेको थियो । आचार्यका अनुसारमा मनाङमा गएको माघ १४ गतेदेखि खोप लगाउने अभियान शुरु भएको थियो ।

अन्तिम अपडेट: पुस ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्