काठमाण्डाै – सुडानमा 'सैन्य कू' मार्फत सत्ता कब्जा गर्ने एउटा असफल प्रयास भएको त्यहाँको सरकारी टेलिभिजनले भनेको छ । 

‘कू गर्ने एउटा असफल प्रयास गरिएको छ मानिसहरूले त्यसको प्रतिवाद गर्नुपर्छ’, सरकारी टेलिभिजनले भनेको छ तर कू गर्ने षड्यन्त्र कसले गरेका हुन् भन्नेबारेमा खुलाइएको छैन । 

राजधानी खार्तुम र ओमडर्मान आसपास क्षेत्रमा बाक्लो सैन्य गतिविधि देखिएको र नाइल नदीका पुलहरू बन्द गरिएको बीबीसीले जनाएको छ । 

समाचार एजेन्सी राेयटर्सका अनुसार सैन्य प्रवक्ता माेहम्मद अल फकी सुलेमानले घटनामा संदिग्धसँग छिट्टै साेधपुछ सुरु हुने बताउनुभएकाे छ । 

दुई वर्षअघि मात्रै देशका लामो समयदेखिका शासक ओमार अल-बशिरलाई अपदस्थ गरेर सत्ता साझेदारी सम्झौताअन्तर्गत सेना, गैरसैनिक प्रतिनिधि र विरोध प्रदर्शनकारी समूहहरू सम्मिलित अन्तरिम सरकार बनाइएकाे थियो ।