काठमाण्डाै – अफगानिस्तानमा पोलियो खोप अभियान सुरु भएको छ । अफगान सरकारले पोलियो उन्मूलन गर्न बालबालिकालाई पोलियो थोपा खुवाउने कार्यक्रम सुरु गरेको हो । 

विश्व स्वास्थ्य सङ्गठन (डब्ल्यूएचओ) र संयुक्त राष्ट्र सङ्घ बालकोष (युनिसेफ) को सहयोगमा पोलियो खोप कार्यक्रम थालिएको त्यहाँका स्वास्थ्य अधिकारीलाई उद्धृत गर्दै समाचार संस्था सिन्ह्वाले जनाएको छ । 

पहिलो चरणमा हिजो साेमवारदेखि सुरु भएको खोप अभियान पर्सि बुधवारसम्म चल्नेछ । खोप अभियानमा पाँच वर्षमुनिका ९० लाखभन्दा बढी बालबालिकालाई समेट्ने लक्ष्य रहेको अफगानिस्तानका कार्यवाहक जनस्वास्थ्य मन्त्री क्वाल्दार अबादले बताउनुभयो । अफगानिस्तानमा यस वर्ष कम्तीमा ५६ जना पोलियोका बालबालिका भेटिएका थिए ।

यसअघि तालिबानले विदेशी कार्यक्रम भनेर अभियानमा संलग्न स्वास्थ्यकर्मीलाई दबाब र यातना दिने गरेका कारण खोप कार्यक्रम प्रभावित हुँदै आएको थियो ।