एमालेकाे १० औँ महाधिवेशन : विद्युतीय मतदानकोे अभ्यास गराइँदै

कात्तिक २३, २०७८ मंगलबार २०:२९:२५ | रासस

काठमाण्डाै – नेकपा एमालेले आसन्न १० औँ राष्ट्रिय महाधिवेशनमा विद्युतीय मेशिनबाट मतदानका लागि पार्टीका नेता–कार्यकर्तालाई नमुना मतदान अभ्यास गराउन थालेको छ । एमालेको केन्द्रीय कार्यालय, थापाथलीमा पार्टीका नेता तथा कार्यकर्तालाई विद्युतीय मेशिनबाट मतदान गर्न सिकाउनका लागि आजदेखि नमुना मतदानको व्यवस्था गरिएको हो । राम–लक्ष्मण भोटिङ मेशिनबाट एमालेले आउँदाे मङ्सिर १० देखि १२ गतेसम्म चितवनमा हुने महाधिवेशनमा विद्युतीय मतदानको प्रयोग गर्ने निर्णय गरिसकेकोे छ ।

‘आजदेखि हामीले पार्टी मुख्यालयमा विद्युतीय मेशिनबाट कसरी मतदान गर्ने भनेर नमुना मतदान गरिरहेका छौँ’, राम–लक्ष्मण इनोभेशनका निर्देशक लक्ष्मण रिमालले भन्नुभयो, ‘पार्टीका नेताले पार्टी कार्यालयमा आएर विद्युतीय मतदान गरिरहनुभएकाे छ ।’

उहाँका अनुसार आजदेखि महाधिवेशनमा मतदान हुनुभन्दा अगाडिसम्म महाधिवेशनका प्रतिनिधिलाई विद्युतीय मेशिनमा मतदान गर्न सिकाइने छ । अहिले पार्टी कार्यालयमा दुई वटा मेशिनबाट नमुना मतदान गरिरहेको र महाधिवेशनस्थलमा भने तीन वटा मेशिनबाट नमुना मतदान गराइने उहाँले जानकारी दिनुभयो । एमालेको नवाैँ राष्ट्रिय महाविधेशनमा विद्युतीय मेशिन प्रयोग गरेर मतदान गर्ने भने पनि आन्तरिक विवादका कारण अन्तिम समयमा आएर प्रयोग गरिएको थिएन । यस पटक एमालेले महाधिवेशनमा चुनावका लागि विद्युतीय मेशिन प्रयोग गर्ने भनेर राम–लक्ष्मण इनोभेशनसँग सम्झौतासमेत गरिसकेको छ ।

निर्देशक रिमालले सबै प्रतिनिधिलाई एक पटक विद्युतीय मेशिनमा नमुना मतदान गराइने बताउनुभयो ।

विद्युतीय मतदानका लागि राम–लक्ष्मण इनोभेसेनले एक सय वटा विद्युतीय मेशिन राख्ने तयारी गरेको छ । एक मेशिनमा दुई जनाले मतदान गर्ने व्यवस्था मिलाइने छ । एमालेको महाधिवेशनमा दुई सय २५ केन्द्रीय सदस्य, अनुशासन र लेखा आयोगमा १५/१५ जना गरी कुल दुई सय ५५ पदका लागि चुनाव हुनेछ । निर्देशक रिमालले एक जना प्रतिनिधिलाई आधा घण्टामा मतदान सक्ने गरी व्यवस्था गरिएको बताउनुभयो । ‘जम्मा ४८ थरिका पदका लागि झन्डै पाँच सय जना उम्मेदवार हुने हाम्रो अनुमान छ’, उहाँले भन्नुभयो, ‘त्यहीअनुसार ती पदमा मतदान गर्नका लागि एक जनाप्रतिनिधिलाई आधा घण्टा लाग्ने हाम्रो आकलन छ ।’

चुनावमा समावेशीसहित ४८ स्थानका लागि ४८ वटा मतपत्रका स्क्रिन ती मेशिनमा रहने छन् । उहाँले चुनाव सकेको तीनदेखि चार घण्टाभित्र नतिजा सार्वजनिक गर्ने जानकारी दिनुभयो ।

एमालेको महाधिवेशनमा एक हजार नाै सय ९९ जना नबढ्ने गरी प्रतिनिधि चयन गरिने छ । एमाले केन्द्रीय प्रचार विभागका उपप्रमुख सूर्य थापाले पार्टीको महाधिवेशनलाई प्रविधिमैत्री बनाउनुपर्छ भन्ने हिसाबले ती मेशिन प्रयोग गर्न लागिएको जानकारी दिँदै देशको ठूलो राजनीतिक दलको महाधिवेशनमा प्रयोग भएपछि अरू दललाई प्रेरणा मिल्न सक्ने जनाउनुभयो । नवौँ महाधिवेशनमा मेशिन प्रयोग नभएका कारण असार २२ गते मतदान सकिएको भए पनि गणना सम्पन्न गर्दा साउन १ गतेसम्म लागेकाले त्यसको तुलनामा मेशिनको प्रयोगले समय र खर्चको बचत गराउन सक्ने जनाउनुभयो ।

यसरी गरिनेछ चुनाव

महाधिवेशनमा सहभागी हुने प्रतिनिधिको निर्वाचन अधिकृतले रुजु गरेपछि मात्र विद्युतीय मेशिनमा मतदान गर्न पाउने छन् । निर्वाचन अधिकृतले नाम रुजु गरिसकेपछि मतदानका लागि प्रतिनिधिलाई कुपन दिइनेछ । त्यही कुपनका लागि मेशिनमा प्रतिनिधिले मतदान गर्नेछन् । प्रतिनिधिले ४८ स्थानका लागि तयार मतपत्रमा ४८ पटक स्क्रिनमा देखिने उम्मेदवारलाई मतदान गर्ने छन् । एउटा स्क्रिनमा मतदान गरेपछि स्वतः अर्को स्क्रिन देखिने छ ।

यसरी एक वटा स्क्रिनमा देखिएका उम्मेदवारलाई मतदान गरिसकेपछि क्रमशः उम्मेदवारलाई मतदान गर्ने सकिनेछ । मतदाताले एक पटक मतदान गरिसकेका उम्मेदवारको सच्चाउन परे फेरि सच्चाएर मतदान गर्न सक्ने निर्देशक रिमालले बताउनुभयो । मतदानका लागि विभिन्न ठाउँमा मतदान केन्द्र राखिने छ । एक वटा मतदान केन्द्रमा आठ वटा मेशिनबाट मतदान गरिने उहाँले जानकारी दिनुभयो । ती मतदान केन्द्रमा एक निर्वाचन अधिकृत, एक प्राविधिक र दुई उम्मेदवारका प्रतिनिधि रहने छन् । विद्युतीय मतदान गर्नका लागि ४० जनाको प्राविधिक टोली खटिने भएको उहाँले बताउनुभयो ।

मतदान भएको चार घण्टामा सबै परिमाण घोषणा गरिने उहाँले बताउनुभयो । मतदान गरिसकेपछि सबै मेशिनबाट कसले कति मत पाए भन्ने नामावलीसमेत प्रिन्ट गरिन्छ । सय वटा मेशिनबाट प्रिन्ट भएका मतलाई जोडेर परिणाम घोषणा गरिने उहाँले बताउनुभयो ।

विद्युतीय मेसिनबाट यसअघि नै एमालेको संसदीय दलको चुनाव भइसकेको छ । तत्कालीन राप्रपा नेपालले पनि यो मेशिन प्रयोग गरेर चुनाव गराइसकेको छ । अहिलेसम्म सबैभन्दा ठूलो चुनाव १० हजार मतदाता रहेको राष्ट्रिय सहकारी बैंकले पनि विद्युतीय मेशिनबाट चुनाव गराइसकेको छ ।

अन्तिम अपडेट: कात्तिक ३०, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्