काठमाण्डाै – कोरोना भाइरसको नयाँ भेरियन्ट ओमिक्राेन भेटिएपछि बेलायत सरकारले मास्क अनिवार्य गरेको छ । स्वास्थ्यमन्त्री साजिद जाभेदले नयाँ भेरियन्टको खतरा बढेकाले आउँदाे मङ्गलवार देखि लागू हुने गरी पसल तथा सार्वजनिक यातायातमा मास्क अनिवार्य गरेको बताउनुभएको बीबीसीले जनाएको छ ।

प्रधानमन्त्री बोरिस जोनसनले यसअघि नै विदेशबाट आउने सबैको पीसीआर परीक्षण गर्ने घोषणा गरिसक्नुभएको छ । बेलायतले विभिन्न १० देशबाट आउने यात्रुलाई १० दिनको क्वरेण्टीन अनिवार्य गरेको छ ।

यस्तै अस्ट्रेलियामा पनि कोरोना भाइरसको नयाँ भेरियन्ट ओमिक्रोन पुष्टि भएको छ । पूर्वी राज्य न्यु साउथ वेल्सको स्वास्थ्य प्राधिकरणले नयाँ भेरियन्ट पुष्टि भएको बताएकाे समाचार संस्था एएफपीले जनाएको छ ।  

साथै इटलीकाे राष्ट्रिय स्वास्थ्य संस्थानले मिलानमा एक व्यक्तिमा नयाँ भेरियन्ट पुष्टि भएकाे जनाएकाे छ । उनी माेजाम्बिकबाट आएका बताइएकाे छ ।