रुसले युक्रेनमा आक्रमण गर्ने चिन्ताका कारण १२ भन्दा धेरै देशले आफ्ना नागरिकलाई युक्रेन छोड्न आग्रह गरेका छन् । 

अमेरिका, अस्ट्रेलिया, इटली, इजरायल, जर्मनी, नेदरल्यान्ड्स, जापान, इराक लगायतका देशले आफ्ना नागरिकलाई युक्रेन छोड्न आग्रह गरेका बीबीसीले जनाएको छ । 

रुसले पनि युक्रेनमा रहेका आफ्ना कुटनीतिक कर्मचारीलाई फिर्ता बेलाएको छ । रुसले युक्रेनसँगको सीमा नजिकै एक लाखभन्दा धेरै सङ्ख्या सेना तैनाथ गरेको छ । तर उसले आक्रमणको योजना रहेको अस्वीकार गर्दै आएको छ ।

अमेरिकाले कुनै पनि समय युक्रेनमाथि आक्रमण सुरु हुन सक्ने चेतावनी दिएको छ । हिजो शनिवार भएको फोनवार्तामा अमेरिकी राष्ट्रपति जो बाइडेनले रुसी राष्ट्रपति भ्लादमिर पुटिनलाई आतिक्रमणको कुनै पनि मूल्य चुकाउनुपर्ने चेतावनी दिनुभएको छ । युक्रेनका राष्ट्रपति भोलोदिमिर जेलेन्स्किीले आक्रमणको चेतावनीले युक्रेनमा त्रास बढेको बताउँदै आउनुभएको छ ।