रुसी विदेशमन्त्री सर्गेई लाभरोभले युक्रेनी सेनाले आत्मसमर्पण गरेमा उससँग वार्ता गर्न मस्को तयार रहेको बताउनुभएको छ । युक्रेनकाे राजधानीमा किएभमा रुसी सेनाहरू अघि बढ्दै गर्दा विदेशमन्त्री लाभाराेसकाे यस्ताे टिप्पणी आएको हो ।

‘युक्रेनको सशस्त्र सेनाले हाम्रो आह्वानलाई सुनेर हतियार बिसाउनेबित्तिकै हामी जुनसुकै बेला वार्ताका लागि तयार छौँ’, लाभरोभले आज शुक्रवार मस्कोमा आयोजित पत्रकार सम्मेलनमा भन्नुभयो । 

यसैबीच उहाँले युक्रेनमाथिकाे सैनिक कारबाहीकाे उद्देश्य त्यहाँका नागरिकलाई दमनबाट मुक्त गराउनु रहेकाे बताउनुभएकाे छ । यसबाट युक्रेनका नागरिकले आफ्नाे भविष्य निर्धारित गर्न सक्ने उहाँकाे भनाइ थियाे ।

रुसकाे विदेश मन्त्रालयले एक भिडियाे सार्वजनिक गरेकाे छ, जसमा विदेशमन्त्री लाभराेभले युक्रेनी सहर दाेनेत्स्क र लुहान्स्कका प्रतिनिधिसँग भेट गरेकाे देख्न सकिन्छ ।