भारतीय पर्यटक बोकेर जनकपुरधाम आइपुग्याे रामायण सर्किट रेल (तस्बिरहरू)

असार ९, २०७९ बिहीबार १८:३४:४२ | उज्यालो सहकर्मी

धनुषा – रामायण सर्किट जोड्ने पहिलो 'भारत गौरव पर्यटक रेल' आज बिहीवार जनकपुरधाम आइपुगेको छ । गएकाे मङ्गलवार बेलुकी ७ बजे भारतको नयाँ दिल्लीबाट छुटेको रेल रामायण सर्किट हुँदै बिहीवार दिउँसो पौने २ बजे जनकपुरधाम आइपुगेको हो ।

धार्मिक, सांस्कृतिक प्रवर्द्धनका लागि झन्डै पाँच सय यात्रुसहित रेल जनकपुरमा पहिलो पटक आइपुगेको छ । जनकपुरधाम आएका तीर्थालुलाई जनकपुर रेल्वे स्टेशनमा मधेस प्रदेशका मुख्यमन्त्री लालबाबु राउत, प्रदेशका उद्योग पर्यटन तथा वनमन्त्री शत्रुधन महतोलगायत विभिन्न सङ्घ–संस्थाका प्रतिनिधिले स्वागत गरेका थिए ।

रेल जनकपुरधाम आइपुगेपछि रेल्वे स्टेशनमा तीर्थालुले जय श्री रामको भजन गाएका थिए । रेल्वे स्टेशनमा स्वागत गर्दै मुख्यमन्त्री राउतले नेपाल–भारतको सम्बन्धमा यस प्रकारको गतिविधिले कोशेढुङ्गा सावित हुने बताउनु भयो । उहाँले आफूहरू सुरुदेखि नै नेपालको भू–भागलाई रामायण सर्किटसँग जोडिनुपर्ने पक्षमा रहेको र आज रेल आएसँगै उत्साहपूर्ण वातावरण निर्माण भएकाे बताउनुभयो ।

मुख्यमन्त्री राउतले यसलाई निरन्तरता दिएको खण्डमा प्रदेशको मात्रै नभइ नेपाल–भारतको पर्यटकीय गतिवधिको समृद्धिको आधार खडा हुनसक्ने बताउनुभयो ।

जनकपुरधाम आइपुगेका तीर्थालुले रामजानकी मन्दिर, गङ्गा सागरमा हुने आरतीलगायतका ठाउँहरू घुमेर भोलि शुक्रवार सितामढी प्रस्थान गर्ने जनाइएको छ । तीर्थालुलाई हेर्न र स्वागत गर्न सयौँको सङ्ख्यामा मानिसहरू रेल्वे स्टेशन पुगेका थिए । वैदिक स्वस्तिक वाचनदेखि परम्परागत बाजाहरूबाट पर्यटकलाई स्वागत गरिएको थियो ।

भारत सरकारले भगवान् राम जहाँ–जहाँ जानुभएको थियो त्यस स्थानलाई रामायण सर्किटको अवधारणा ल्याएर जोड्ने काम गरिरहेको छ । यसले रामायणकालीन विभिन्न स्थलहरूमा पर्यटककाे सहजै आवागमन हुने बताइएको छ ।

रेलले आठ हजार किलोमिटर लामो यात्रा गर्न १८ दिनको समय निर्धारण गरिएको छ । रेलको सर्वाधिक महत्त्वपूर्ण गन्तव्य जनकपुरधाम र अयोध्या रहेको छ । सीता र रामको जन्मस्थललाई जोड्दै रामायणकालीन सीताराम सम्बद्ध प्रसिद्ध स्थलहरूको तीर्थालुले दर्शन गर्न पाउनेछन् ।

अन्तिम अपडेट: पुस २, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्