रसुवा – सान्जेन हाइड्रोपावर कम्पनीलाई आयोजना प्रभावितले नै शेयर निष्कासन नगर्न माग गर्दै ज्ञापनपत्र बुझाएका छन् । नेपाल धितोपत्र बोर्डले निष्कासन अनुमति दिएसँगै कम्पनीले आयोजना प्रभावित स्थानीयका लागि आइपीयो बिक्री गर्न लागेको छ । 

प्रभावितका लागि एकैपटक २ वटा कम्पनीले शेयर निष्कासन गर्दा समस्या आउने भन्दै शेयर निष्कासन प्रक्रिया रोक्न स्थानीले माग गरेका हुन् । शुक्रबार सान्जेन जलिविद्युत् आयोजना मार्फत कम्पनीलाई ज्ञापनपत्र बुझाइएको स्थानीय फुर्पुसिंगी तामाङले बताउनुभयो । उहाँका अनुसार कोरोना महामारीका कारण शेयर भर्नका लागि स्थानीयसँग रकम नभएको र बैंले पनि ऋण नदिने हुँदा समस्या सिर्जना भएको छ ।

रसुवागढीले यही असार १३ गतेदेखि प्रभावितका लागि शेयर निष्कासन गर्दै छ । ‘दुवै कम्पनीले एउटै समयमा शेयर निष्कासन गर्नु भनेको स्थानीयलाई यो जलविद्युत कम्पनीको शेयरबाट बञ्चित गराउन खोजिएको हो, ज्ञापनपत्रमा भनिएको छ ।’ जिल्लावासीका लागि सान्जेनले ३६ लाख ५० हजार कित्ता शेयर निष्कासन गर्ने छ । यसमा बिक्री प्रबन्धकको काम नागरिक लगानी कोषले गर्नेछ । 

विश्वव्यापी फैलिएको कोरोना भाइरस (कोभिड–१९) को कारण लामो समयसम्म शेयर निष्कासन प्रक्रिया रोकिएको थियो । कम्पनीले रसुवाको आमाछोेदिङ्मो–५, चिलिमेमा १४.८ मेगावट क्षमताको माथिल्लो सान्जेन र ४२.५ मेगावटको सान्जेन जलविद्युत् आयोजना निमाण गरिरहेको छ ।