काठमाण्डाै – सर्वोच्च अदालतले कमल थापा अध्यक्ष रहनुभएको राष्ट्रिय प्रजातन्त्र पार्टी नेपाललाई ‘गाई’ चुनाव चिह्न प्रदान नगर्ने निर्णय तत्काल कार्यान्वयन नगर्न निर्वाचन आयोगका नाममा अन्तरिम आदेश गरेको छ ।

न्यायाधीशद्वय डा. आनन्दमोहन भट्टराई र डा. कुमार चुँडालको संयुक्त इजलासले आइतवार गाई चुनाव चिह्न अन्य कुनै दललाई पनि प्रदान नगर्नु र निर्वाचन आयोगको निर्णय पनि कार्यान्वयन नगरि यथास्थितिमा राख्नु भनी अन्तरिम आदेश गरेको हो ।

आदेशमा आयोगको गएकाे असार २७ को निर्णय अहिले कार्यान्वयन नगर्नसमेत भनिएको छ । साथै निर्वाचन आयोगलाई सात दिनभित्र लिखित जवाफ पेस गर्न भनिएको छ । 

निर्वाचन आयोगले देशको राष्ट्रिय जनावर र हिन्दू धर्मसँग जोडिएको उल्लेख गर्दै राप्रपा नेपाललाई गाई चुनाव चिह्न दिन अस्वीकार गरेको थियो । आयोगको त्याे निर्णयकाे विरुद्धमा थापाले सर्वोच्च अदालतमा रिट निवेदन दायर गर्नुभएको थियो ।