अमेरिकाको तल्लो सदन हाउस अफ रिप्रिजेन्टेटिभ्सकी सभामुख न्यान्सी पेलोसीले ताइवान विश्वकै स्वतन्त्र समाजमा पर्ने बताउनु भएको छ । बिहान ताइवानको संसदलाई सम्बोधन गर्दै उहाँले अमेरिका र ताइवानबीचको संसदीय आदन प्रदान गर्न चाहेको बताउनुभयो ।

पेलोसीले आगामी दिनमा अमेरिकाले ताइवानसँग विज्ञान प्रविधि तथा अनुसन्धानको क्षेत्रमा ठूलो लगानीको लागि सहकार्य गर्ने बताएका बीबीसीले जनाएको छ । यस्तै, उहाँले ताइवानका राष्ट्रपति साई इंग–वेनसँग भेटवार्ता गर्नु भएको छ । राष्ट्रपति भवनमा भएको भेटमा उहाँले ताइवानसँग अमेरिकाको सम्बन्ध महत्वपूर्ण रहेको बताउनुभयो । दुई देशबीचको सुमधुर सम्बन्धलाई लिएर गर्व लाग्ने भन्दै उहाँले आगामी दिनमा सम्बन्ध अझै प्रगाढ बन्ने दाबी गर्नु भएको छ ।

ताइवानलाई आफ्नो अभिन्न अंग दाबी गर्दै आएको चीनको चेतावनीका बाबजुद् सभामुख पेलोसी ताइवान पुग्नु भएको छ । यसैबीच, विरोधका बाबजुद उच्च अमेरिकी अधिकारी ताइवान पुगेपछि चीनले अमेरिकालाई गम्भीर मूल्य चुकाउनुपर्ने चेतावनी दिएको छ । अमेरिकाले अत्यन्तै खराब परिस्थितिको सामना गर्नुपर्ने चीनले चेतावनी दिएको छ । यसैबीच चीनले थप ताइवानी उत्पादनलाई प्रतिबन्ध लगाएको छ ।  पेलोसीको भ्रमण लगत्तै  चीनले ताइवानी सामान र उत्पादनहरू प्रतिबन्ध लगाएको हो ।

न्यान्सी पेलोसी ताइवान पुगेपछि चीनद्वारा सैन्य अभ्यासको घोषणा, लडाकु विमान तैनाथ

---