मतदान स्थल पुग्दै कर्मचारी र सुरक्षाकर्मी : कतै बाक्लो हिउँले समस्या

मंसिर २, २०७९ शुक्रबार ७:१५:४१ | उज्यालो सहकर्मी

काठमाण्डाै - पर्सि आइतवार हुने प्रतिनिधि सभा र प्रदेश सभा सदस्य चुनावका लागि कर्मचारी र सुरक्षाकर्मी मतदान स्थल पुग्न थालेका छन् । निर्वाचन आयोगले आवश्यक सम्पूर्ण तयारी तथा व्यवस्थापन पूरा भएको जनाएको छ। कतिपय कर्मचारी र सुरक्षाकर्मी यसअघि नै चुनाव सामग्रीसहित मतदान स्थलमा पुगिसकेका छन् ।

मुख्य निर्वाचन कार्यालय र निर्वाचन कार्यालयबाट मतदान स्थल र केन्द्रमा खटिएका कर्मचारी आवश्यक सामग्री बुझेर कार्यस्थलमा खटिन थालेका निर्वाचन आयोगले जनाएको छ । उनीहरुले बुझेको सामग्री प्रहरीको सुरक्षामा मतदान स्थलमा लैजाने व्यवस्था छ ।

अर्घाखाँचीका निर्वाचन क्षेत्रतर्फ जाँदै त्यहाँका कर्मचारी

चुनावमा खटिएका कर्मचारीले तोकिएको निर्वाचन अधिकृतको कार्यालबाट मतपत्र, मतपेटिका, छेकबार, स्वस्तिक छाप, लाहा, मतपेटिका सुरक्षण सिल, स्टिकर, स्ट्याम्प प्याड, मसी, मतदाता परिचयपत्र, रबर म्याट, कपडा, कैँची, स्केल, कागज, सियो, धागो, सलाई, ब्रोसरलगायतका ५६ प्रकारका निर्वाचन सामग्री बुझेका छन् । ती सामग्रीलाई मतदान केन्द्रका अधिकृत, कर्मचारी र सुरक्षाकर्मीले सुरक्षा दिएर राख्नेछन् । साथै मतदान स्थल निर्माणको काम सुरु हुनेछ ।

मतदान अधिकृतसहितका कर्मचारीले मतदान केन्द्र वरिपरि कुनै पनि प्रकारको जाँडरक्सी खान पाइनेछैन । चुनावको सुरक्षाका लागि पहिलो घेरामा म्यादी प्रहरी, नेपाल प्रहरी, दोस्रो घेरामा सशस्त्र प्रहरी बल र तेस्रो घेरामा नेपाली सेना खटिनेछन् ।

एक मतदान केन्द्रका लागि मतदान अधिकृत, सहायक मतदान अधिकृत, सहायक कर्मचारी पाँच र सहयोगी एकसहित आठ जना कर्मचारी रहने व्यवस्था छ । कतिपय नजिकका मतदान केन्द्रले सुरक्षाको कारण मतपत्र नबुझेको र त्यहाँ आज र भोलि मतपत्र लगिनेछ ।

कतिपय विकट जिल्लाका विकट ठाउँमा खटिएका कर्मचारी र सुरक्षाकर्मी समस्यामा परेका छन् । मुस्ताङका प्रहरी प्रमुख डीएसपी रविन्द्र पौडेलका अनुसार बाटोमा हिउँ जमेका कारण वारागुङमुक्ति क्षेत्र गाउँपालिका–५ साङ्ताको हिमाली आधारभूत विद्यालय मतदान केन्द्रमा मतदान गराउन कर्मचारी र सुरक्षाकर्मी पुग्न सकेका छैनन् ।

पर्वतका कर्मचारी निर्वाचन क्षेत्रतर्फ खटिँदै

आज डोजर लगेर बाटो सफा गरी कर्मचारी पुर्याउने तयारी छ । हुम्लाको नाम्खा गाउँपालिका–६ को लिमीका तीन वटै मतदान केन्द्रमा हेलिकप्टरबाट कर्मचारी र सुरक्षाकर्मी पुर्याइएको छ । निमित्त निर्वाचन अधिकृत श्यामबहादुर रानाका अनुसार लिमीका तीन वटा मतदान केन्द्रका लागि खटिएका कर्मचारी र सुरक्षाकर्मीलाई हेलिकप्टरबाट लगिएको हो ।

प्रतिनिधि सभा र प्रदेश सभा चुनावमा मतपत्र र चुनाव सामग्रीसहित २ लाख ४६ हजार ९ सय ६० कर्मचारी र नेपाली सेना, प्रहरी, सशस्त्र र म्यादी प्रहरी गरी झण्डै ३ लाख जनशक्ति खटिएको छ । देशभर एकैसाथ हुन लागेको चुनावमा कुल १ करोड ७९ लाख ८८ हजार ५ सय ७० मतदाता छन् ।

उनीहरूले १० हजार ८ सय ९२ मतदान स्थलमा रहेका २२ हजार २ सय २७ केन्द्रबाट मतदान गर्नेछन् । त्यस्तै, १ सय ४१ अस्थायी मतदान केन्द्रबाट ४ लाख ५० हजार अस्थायी मतदाताले प्रतिनिधि सभाको समानुपातिकमा भोट खसाल्नेछन् । प्रतिनिधि सभाका लागि २ हजार ४ सय १२ र प्रदेश सभाका लागि ३ हजार २ सय २४ जना उम्मेदवार छन् । चुनाव आउन अब दुई दिन मात्रै बाँकी छ।

अन्तिम अपडेट: पुस २, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

मतदान स्थल पुग्दै कर्मचारी र सुरक्षाकर्मी : कतै बाक्लो हिउँले समस्या

तस्बिर : रासस

तपाईको प्रतिक्रिया