काठमाण्डाै – सङ्घीय संसद् सचिवालयका सहसचिव डा. रोजनाथ पाण्डे सचिवमा बढुवा हुनुभएको छ । 

संसद् सचिवालय सञ्चालन तथा व्यवस्थापन समितिको आज बुधवारको बैठकले उहाँलाई सचिवमा पदोन्नति गर्ने निर्णय गरेको हो । यस समितिमा अहिले राष्ट्रियसभा अध्यक्ष, सचिवालयका महासचिव र सचिवालयकै तीन जना सचिव रहनुभएको छ ।

त्यसअघि लोक सेवा आयोगको बढुवा समितिले उहाँलाई सचिवमा बढुवाका लागि सिफारिस गरेको थियो । उहाँ अहिले लेखा समितिको सचिव, प्रशासन महाशाखाका प्रमुख एवम् प्रवक्ताको जिम्मेवारीमा हुनुहुन्थ्यो ।

निजामती सेवामा २०६७ चैत २४ गतेदेखि उपसचिवबाट सेवा प्रवेश गर्नुभएका पाण्डे २०७३ वैशाख २० गते खुला प्रतिस्पर्धाबाट संसद् सेवाको सहसचिवमा आउनुभएको थियो । नेतृत्व व्यवस्थापन विषयमा विद्यावारिधि गर्नुभएका उहाँले त्यसअघि विश्वविद्यालय अनुदान आयोगमा कार्यक्रम अधिकृतका रूपमा पाँच वर्ष काम गर्नुभएको थियो ।