माेरङ – नेपाली कांग्रेसका नेता एवम् सांसद शेखर कोइरालाले फागुन २८ गते अगाडि राष्ट्रपतिको चुनाव भैसक्नुपर्ने बताउनुभएको छ । विराटनगरमा प्रेस युनियन प्रदेश १ को प्रथम अधिवेशनमा सांसद कोइरालाले फागुन २८ गते अगाडि राष्ट्रपतिको चुनाव नभए देशमा संवैधानिक संकट आउने पनि दाबी गर्नुभयो ।

उहाँले देशका लागि संविधानभन्दा माथि नभइ, संविधान मातहत रहने राष्ट्रपति आवश्यक रहेको बताउनुभयो । यसअघि सदनबाट पारित भैसकेको नागरिकता विधेयक राष्ट्रपतिले संविधान विपरीत अल्झाएको भन्दै अब संविधानलाई स्वीकारेर अघि बढ्ने राष्ट्रपति चाहिने बताउनुभयो । उहाँले राष्ट्रपति पदमा कांग्रेसले उम्मेदवारी दिने पनि बताउनुभयो ।

यस्तै फरक प्रशंगमा नेता कोइरालाले रवि लामिछानेको घटनाले यो देशमा कानुनी राज्य छ भन्ने कुरा प्रमाणित भएको भन्दै त्यसबाट सबैले पाठ सिक्नु आवश्यक रहेको बताउनुभयो । रवि लामिछानेको मुद्धामा अदालतले गरेको फैसलाले नेपालमा कानूनी राजको उदाहरण प्रस्तुत गरेको उहाँको भनाई छ । नेता कोइरालाले कांग्रेस जुनसुकै बेला सरकारमा जान सक्ने पनि बताउनुभयो । 

“राजनीतिमा सरकार फेरबदल भइरहन्छन्, ठूलो पार्टी कांग्रेसको नेतृत्वमा पनि कुनै दिन सरकार बत्र सक्ने सम्भावना छ”, उहाँले भन्नुभयो । नेता कोइरालाले कांग्रेस र देशको राजनीति कठीन अवस्थामा पुगेको उल्लेख गर्दै देश आर्थिकरुपमा कमजोर भएको बताउनुभयो । सातवटै प्रदेशमा मन्त्रालयको सङ्ख्या घटाउने निर्णय सराहनीय छ भन्दै उहाँले यसबारे सङ्घीय सरकारको पनि ध्यान जानुपर्ने धारणा राख्नुभयो ।