काठमाण्डाै – छैटाैँ संस्करणको मुख्यमन्त्री सुदूरपश्चिम खप्तड गोल्ड कप अन्तर्राष्ट्रिय फुटबल प्रतियोगितामा क्यामरुनको एभिनर फुटबल क्लबले खुमलटार एफसीलाई हराएको छ । शुक्रवार भएकाे खेलमा क्यामरुनको एभिनर फुटबल क्लबले 'ए' डिभिजन क्लब खुमलटारलाई ३–१ गोलले हराएकाे हाे । 

धनगढी रङ्गशालामा भएको खेलमा विदेशी टोली एभिनरका लागि माेसिसले २ र कोन्फोरले १ गाेल गरे । खुमलटारका लागि अनुज भण्डारीले गोल गरे । अब एभिनरले सेमिफाइनल प्रवेशका लागि बाग्मती युवा क्लब र मनाङ मर्स्याङ्दी क्लबबीच हुने खेलको विजेतासँग खेल्ने छ ।

मोफसलको सर्वाधिक पुरस्कार राशीको यस प्रतियोगिताको विजेताले २१ लाख रुपैयाँ र उपविजेताले १० लाख रुपैयाँ प्राप्त गर्नेछन् । सुदूरपश्चिम प्रदेश सरकार मुख्य प्रवर्धक रहेको प्रतियोगितालाई सुदूरपश्चिम ११ स्पोर्ट्स क्लबले आयोजना गरेको हो । आयोजकसहित 'ए' डिभिजनका ६, विदेशी टोली २ र मोफसलको १ गरी १० टोलीको सहभागिता रहेको छ ।